Një zjarr dhe një shpërthim i madh kanë vrarë të paktën 30 persona dhe plagosën qindra të tjerë në një depo magazinimi pranë qytetit të Chittagong, Bangladesh, transmeton InLajmi.
Qindra njerëz kishin mbërritur për të shuar zjarrin kur një numër kontejnerësh shpërthyen në vendin në Sitakunda.
Nuk dihet shkaku i zjarrit, por mendohet se në disa prej kontejnerëve janë ruajtur lëndë kimike.
Spitalet e zonës janë të mbingarkuar dhe kanë apeluar për dhurim gjaku.
Shumë prej të plagosurve raportohet se janë në gjendje kritike me djegie që mbulojnë 60% deri në 90% të trupit të tyre.
“Shpërthimi sapo më hodhi rreth 10 metra larg vendit ku po qëndroja. Duart dhe këmbët e mia janë djegur,”tha shoferi i kamionit Tofael Ahmed për agjencinë e lajmeve AFP.
Një tjetër vullnetar i tha agjencisë se kishte parë më shumë trupa brenda zonës së prekur nga zjarri.
Mes të vrarëve dhe të plagosurve ka disa zjarrfikës.
Sipas një zyrtari të qeverisë rajonale, depoja përmbante miliona dollarë veshje që prisnin të eksportoheshin në shitësit perëndimorë. Bangladeshi është një furnizues kryesor i veshjeve në Perëndim.
Shpërthimi ishte aq i madh sa u dëgjua disa kilometra larg dhe theu xhamat e ndërtesave aty pranë. Një shitës lokal u tha gazetarëve se një copë mbeturinash kishte fluturuar gjysmë kilometri dhe kishte rënë në pellgun e tij. Ai përshkroi se kishte parë “topa zjarri që binin si shi” pas shpërthimit.
Zjarri ishte ende i ndezur të dielën në mëngjes, disa orë pas shpërthimit. Ushtria është vendosur për të parandaluar derdhjen e kimikateve në det.
Sitakunda është vetëm 40 km (25 milje) nga qyteti i dytë më i madh i Bangladeshit, Chittagong, dhe një nga spitalet e qytetit është përmbytur me viktima. Klinikat ushtarake po ndihmojnë në trajtimin e të plagosurve.
Zjarret janë të zakonshme në Bangladesh. Vitin e kaluar, të paktën 39 njerëz u vranë pasi një traget mori flakë në jug të vendit. Dhe më herët po atë vit, të paktën 52 njerëz vdiqën në një zjarr në fabrikë në Rupganj pranë kryeqytetit, Dhaka, shkruan BBC.
3 punëtorë u vranë gjithashtu në 2020 pasi një rezervuar nafte shpërtheu në një depo tjetër depozitimi kontejnerësh në Patenga, jo shumë larg Chittagong./InLajmi/
