Shefi i Grupit Parlamentar të Partisë Demokratike të Kosovës, Abelard Tahiri, ka reaguar lidhur me raportimet e fundit për keqpërdorime në kuadër të ministrive në qeverinë Kurti, përcjell InLajmi.
Tahiri ka thënë se afera që e partia e tij ka prezantuar dje për keqpërdorim të 1.1 milionë eurove nga ministrat Damka dhe Gërvalla, shfaq vetëbesimin e verbër se këta ministra janë mbi ligjin,
Ai ka thënë se keqpërdorimet dhe aferat tjera tregojnë fytyrën e vërtetë të qeverisë dhe papërgjegjësinë karshi ligjit dhe qytetarëve.
Postimi i plotë i tij:
Është e pabesueshme se me çfarë guximi kanë filluar të abuzojnë me paranë publike ministrat e Qeverisë Kurti, duke mos u tunduar të dinë për ligjin, lere më t’iu nënshtrohen ligjeve kur është fjala për shpërndarjen e parave të taksapaguesve të Kosovës.
2 ministra protagonistë të një afere të tillë, Ministrja Gërvalla Schëarz dhe Ministri Fikrim Damka, i keqpërdorën 1.1 milion euro, duke i ndarë këto para jashtëligjshëm ndaj një OJQ-je.
Kjo aferë, përveç që shpërfaqë paaftësinë institucionale të kësaj qeverie, shpërfaqë edhe vetëbesimin e verbër se këta ministra janë mbi ligjin dhe se paranë publike e konsiderojnë si mjet për të mbuluar deficitet e tyre të gjithanshme, pa ndjerë kurrfarë përgjegjësie për to, e për mënyrën se si shpenzohen ato.
Keqpërdorimi dhe abuzimi i jashtëligjshëm i këtyre 2 ministrave, ngjashëm si edhe afera të tjera korruptive që i kemi ngritur më parë e që po dalin në shesh për çdo ditë, tregojnë fytyrën e vërtetë të kësaj qeverie dhe papërgjegjësinë e saj karshi ligjit e qytetarëve. /InLajmi/
