Kryeparlamentari i Kosovës, Glauk Konjufca, gjatë qëndrimit në Athinë është pritur në takim nga kryetari i Parlamentit të Republikës Helene Konstantin Tassoulas, përcjell InLajmi.
Konjufca tha se ka kërkuar nga Tassoulas për themelimin e bashkëpunimit ndërparlamentar mes Athinës dhe Kosovës.
Gjithashtu i pari i kuvendit tha se kanë diskutuar për zhvillimet globale dhe janë pajtuar se përpjekjet për ruajtjen e paqes duhet të intensifikohen.
Postimi i plotë i tij:
Gjatë qëndrimit tim në Athinë, në kuadër të punimeve të Asamblesë Parlamentare të Procesit të Bashkëpunimit në Evropën Juglindore, jam pritur në një takim 2 palësh nga kryetari i Parlamentit të Republikës Helene Konstantin Tassoulas.
E falënderova Tassoulas për përkrahjen që vendi i tij i ka dhënë Kosovës gjatë gjithë etapave shtetndërtuese si dhe kërkova prej tij thellimin e bashkëpunimit ndërparlamentar mes 2 vendeve tona.
Kryetari i Parlamentit të Republikës Helene Tassoulas shprehu falënderimet e tij për diskutimet konstruktive të delegacionit tonë nga Kosova dhe na siguroi se vendi i tij do të vazhdojë qasjen konstruktive ndaj Kosovës.
Ne gjithashtu diskutuam lidhur me zhvillimet globale dhe u pajtuam se përpjekjet për ruajtjen e paqes duhet të intensifikohen. /InLajmi/
