Kryetari i LDK-së, Lumir Abdixhiku i ka bërë thirrje Qeverisë së Kosovës, që të reduktojë akcizën në derivate si dhe TVSH-në në naftë dhe produkte bazike, përcjell InLajmi.
Ai tha se këto vendime i kishin propozuar 3 muaj më parë, mirëpo theksoi se nga Qeveria e Kosovës kishin marrë vetëm injorim, me arsyetimin se kriza është e njëjtë si në Evropë.
Abdixhiku tha se kjo krizë është e njëjta, por qeveritë evropiane po ndërmarrin masa të ndryshme, ai mori si shembull Gjermaninë, e cila ka reduktuar akcizën dhe barrën tatimore në naftë për 35 cent me qëllim të lehtësimit të përballueshmërisë për qytetarët.
Kryetari i LDK-së tha se Qeveria e Kosovës po vazhdon ta injorojë krizën dhe çmimet e naftës po vazhdojnë të mbesin të larta.
Postimi i plotë i tij:
Me qëllim të lehtësimit të përballueshmërisë për qytetarët më të pasur evropian, Qeveria gjermane nga 1 qershori i këtij viti ka reduktuar akcizën dhe barrën tatimore në naftë për 35 cent. Efektet e rënies së çmimeve u panë dy ditë më pas; dje dhe sot përkatësisht.
Në vendin më të varfër evropian ndërsa, Qeveria e Kosovës vazhdon të injorojë krizën e përballueshmërisë së qytetarëve tanë. Çmimet e naftës vazhdojnë të mbesin të larta, e si pasojë dhe të dhjetra produkteve bazike në Kosovë.
E kishim propozuar më 7 mars, plot tre muaj më parë, reduktimin e TVSH-së e të akcizës në naftë, për të njëjtat efekte që shihen në Gjermani sot. Ishim injoruar me arsyetimin se kriza është e njëjtë nëpër Evropë. E njëjtë është kjo krizë – natyrisht – por masat që kanë ndërmarrë e po ndërmarrin qeveritë evropiane janë të ndryshme. Asnjëra nga to nuk vështron për të mosvepruar si kjo e Kosovës.
Për ta thënë të njëjtën gjë sërish tre muaj më pas:
Të reduktohet akciza në derivate.
Të reduktohet TVSH në naftë dhe produkte bazike. /InLajmi/
