Mbrojtësi i West Ham, Kurt Zouma, u dënua me 180 orë shërbim publik, pasi u deklarua fajtor për goditjen e maces së tij, transmeton InLajmi.
Ai u ndalua gjithashtu të mbajë mace për 5 vjet si dhe u detyrua të paguante pothuajse 9.000 funte për shpenzimet gjyqësore.
Pamjet shqetësuese të incidentit, të filmuara në shtëpinë e Zouma dhe të postuara në Snapchat nga vëllai i tij, Yoan, u shfaqën në shkurt.
Pamjet treguan Zouman duke shkelmuar, hedhur dhe goditur me shuplakë macen e tij Bengal, një akt që shkaktoi zemërim të gjerë. Në video u shfaq edhe ai duke thënë “Betohem se do ta vras”.
Që nga incidenti, Zouma ka humbur një marrëveshje sponsorizimi me Adidas, si dhe vendin e tij në ekipin kombëtar francez, ndërsa është gjobitur me 250.000 funte, shkruan Sky Sport.
Macet e Zoumas u sekuestruan nga policia dhe u morën nën kujdesin e Shoqatës Mbretërore për Parandalimin e Mizorisë ndaj Kafshëve, ku ato kanë qëndruar që atëherë. /InLajmi/
