Klubi i Chelseas ka njoftuar se më në fund është kompletuar shitja e klubit.
Konsorciumi i udhëhequr nga Todd Boehly, kryetar dhe ‘CEO’ i Eldridge, dhe Clearlake Capital Group, L.P, njoftoi sot përfundimin e transferimit të pronësisë së Chelseas.
Roman Abramovich ka përfunduar shitjen prej 4.25 miliardë funtesh të Chelseas në drejtim të pronarëve të rinj, duke i dhënë fund pronësisë së tij 19-vjeçare të klubit.
Sipas kushteve të marrëveshjes, Boehly dhe Clearlake do të ndajnë kontrollin e përbashkët dhe qeverisjen e barabartë të Klubit. Boehly do të shërbejë si Kryetar mbajtës i kompanisë, transmeton Sinjali.
“Boehly dhe Clearlake janë të përkushtuar për të investuar në fusha kyçe që do të zgjerojnë dhe rrisin konkurrencën e Chelsea, duke përfshirë rizhvillimin e Stamford Bridge, investime të mëtejshme në Akademi, Ekipin e Grave dhe stadiumin Kingsmeadow. Pronarët do të vazhdojnë gjithashtu punën e rëndësishme të Fondacionit Chelsea”, thuhet në faqen zyrtare të klubit londinez.
