Koordinatorja për Siguri nga Kabineti për Qeverisje të Mirë në Partinë Demokratike të Kosovës, Besa Kabashi-Ramaj thotë se Qeveria aktuale nuk ka vizion për sektorin e sigurisë.
Ajo tha se nuk ka parë ndonjë plan konkret për këtë fushë nga Qeveria.
”Ne veç kemi dhënë kontribute konkrete përmes një konference ku i kemi dhënë specifike karshi strategjisë që ka publikuar për konsultim publik. Fatkeqësisht çka mund të themi qeverisë aktuale i mungon vizioni për sektorin e sigurisë dhe nuk kemi parë publikisht plan konkret ku Qeveria thotë se kështu e shohim sektorin e sigurisë”, shtoi ajo.
Madje, Kabashi-Ramaj thotë se me ndarjen e mjeteve financiare për Forcën e Sigurisë së Kosovës, ka parë një selektim nga Qeveria për sektorin e sigurisë, duke shtuar se kjo nuk duhet të ndodhë.
“Qasja ndaj sigurisë nuk guxon të jetë selektive. Sektori i sigurisë si komponentë të rëndësishme e ka FSK-në, por nuk është vetmja. Siguria shihet shumë më gjerë nuk përfshihen vetëm Ushtria, Policia Zjarrfikësat aty përfshihet edhe Ministria e Shëndetësisë. Në sektor të sigurisë duhet përfshirë dhe Ministria e Arsimit se kemi parasysh kërcënimet përfshijnë edhe akterë që mund të cenojnë jetërat e fëmijëve. Në këto raste përgejgjës primar në incidente të tilla është shkolla edhe ky sektor ka rëndësi të jashtëzakonshme”, tha ajo.
Kurse, sa i përket sigurisë kombëtare nga lufta Rusi-Ukrainë, thotë se nga kjo nuk rrezikohet Kosova në mënyrë direkte, shkruan Tëvë1.
“Sa i përket sigurisë Kosova nuk kanoset direkt nga një luftë konvencionale më shumë për shkak se është duke ndodhur konflikti mes Rusisë dhe Ukrainës, në aspektin global shumë gjëra kanë ndryshuar për këtë luftë. Por ka efekte të ndërthorta karshi rritjes së çmimeve të disa produkteve, sigurisë njerëzore, karshi qasjes në tregjet e ndryshme. Dhe mendoj që në këtë aspekt Qeveria ka mundur të bëjë shumë më shumë në parapërgatitje qoftë të dikastereve, por edhe të sigurisë karshi këtyre rreziqeve”, deklaroi ajo.
