Trajneri i Anglisë, Gareth Southgate ka folur për 2-shen Marcus Rashford dhe Jadon Sancho.
Rashford dhe Sancho gjatë këtij sezoni nuk kanë pasur vazhdimësi me Manchester United, andaj kjo ka ndikuar që trajneri i Anglisë mos t`i ftojë për ndeshjet e qershorit.
Të 2 sulmuesit nuk janë në formë optimale që nga humbja e Anglisë nga Italia në finalen e Kampionatit Evropian vitin e kaluar. Ata u lanë jashtë edhe një herë kur Southgate publikoi skuadrën e tij për ndeshjet e Ligës së Kombeve.
Në lidhje me këtë ka folur Southgate duke thënë se ata nuk kishin luajtur në ndeshjet e fundit të sezonit, por mund të rikthejnë formën e tyre.
“Mendoj se ka mjaftueshëm një bllok lojërash në fillim të sezonit të ardhshëm, ku lojtarët ende mund të rikthejnë formën e tyre. Por ata duhet të fillojnë të luajnë mirë me klubin e tyre. Asnjëri prej tyre nuk ka luajtur në fund të sezonit”, ishin fjalët e anglezit.
Rashford dhe Sancho të 2 luftuan për formën dhe qëndrueshmërinë nën drejtimin e trajnerit të përkohshëm Ralf Rangnick sezonin e kaluar, pasi United përfundoi në vendin e gjashtë në Premier Ligë dhe humbi një vend në Ligën e Kampionëve.
“Anglia është pasojë e asaj që po bëni në klubin tuaj dhe ju duhet ta rregulloni klubin tuaj sa duhet”, shtoi Southgate, përcjell lajmi.net.
Anglia në muajin qershor do të luajë kundër Hungarisë, Italisë dhe Gjermanisë, në kuadër të Ligës së Kombeve.
