Avokati i Nasim Haradinajt, Toby Cadman, ka folur në një intervistë për Televizionin T7 disa ditë pas shpalljes së verdiktit nga Gjykata Speciale ndaj Haradinajt dhe Hysni Gucatit, nën akuzat për pengim të administrimit të drejtësisë.
Ai ka thënë se vendimi do të apelohet në shkallën e 2-të, me shpresën që argumentet e mbrojtjes të shqyrtohen edhe një herë në mënyrë të duhur, përderisa ka zbuluar se vetëm një ditë para shpalljes së verdiktit, e kishte takuar Haradinajn dhe ai kishte thënë se ai ishte i përgatitur për dënimin.
Cadman është shprehur i zhgënjyer me dënimin ndaj klientit të tij, duke thënë se kishte konsideruar që dëshmitë e përgatitura për mbrojtjen e Haradinajt, ishin të forta.
“Natyrisht, ne ishim shumë të zhgënjyer me vendimin. Ne konsideruam se çështja që ne kishim paraqitur ishte e fortë dhe çështja që kishte paraqitur prokuroria ishte e pamjaftueshme për të përmbushur, siç e dimë, barrën e të vërtetuarit jashtë dyshimit të arsyeshëm. Ne konsideruam se kishim parashtruar një rast mjaft të fortë për Haradinaj që të shpallet i pafajshëm për të gjitha pikat. Pra, ne ishim të zhgënjyer”, deklaroi ai.
Megjithatë, ka deklaruar Cadman, ai dhe klienti i tij Haradinaj, ishin të përgatitur edhe për më të keqen. Pra, edhe dënimin që edhe u shqiptua 9 ditë më parë nga trupi gjykues, i drejtuar nga Charles Smith.
“Epo, ju kurrë nuk doni të thoni, sa herë që përfshiheni në një proces si ky, kurrë nuk dëshironi të thoni se përfundimi dihet. Por ne, unë dhe Haradinaj, ishim të përgatitur për më të keqen. Ne ishim të përgatitur që ai do të dënohej dhe arsyet që ne parashtruam, si pjesë e mbrojtjes së tij, ishin interesi publik dhe se kishte vështirësi gjatë gjithë procesit gjyqësor për sa i përket zbulimit të provave”, deklaroi tutje avokati Cadman
Ndonëse të përgatitur “për më të keqen”, për avokatin Cadman, dënimi i shqiptuar ndaj Haradinajt prej 4 vjetësh e gjysmë, është jashtëzakonisht jo proporcional. Ai zbuloi edhe një takim me Haradinajn një ditë para shpalljes së dënimit dhe tregoi se ai ishte i përgatitur për dënimin.
“Është gjithmonë shumë e vështirë ato momentet e para kur një person është dënuar në rrethana të tilla dhe merr një dënim që ne mund ta përshkruajmë vetëm si jashtëzakonisht jo-proporcional. Kam takuar Haradinaj një ditë më parë, në njësinë e paraburgimit, ku diskutuam se cilat ishin përfundimet e mundshme të seancës dhe ai ishte përgatitur për dënim”, tha Cadman, duke thënë se besonin që dënimi ndaj Haradinajt do të ishte maksimalisht për kohën sa kishte qëndruar në paraburgim.
“Dhe pa harruar se shumica dërrmuese e këtyre rasteve në gjykatat ndërkombëtare kanë rezultuar me një dënim financiar në fund, jo me burgim të gjatë. Pra, mendoj se Haradinaj ishte i përgatitur për më të keqen. Dënimi që u dha ishte dënimi më i ashpër i dhënë ndonjëherë në një rast si ky, sigurisht që është tronditës. Dhe sigurisht, fakti se do t’i duhet të kalojnë një periudhë shtesë deri në 2 vite burg është tronditës, është tronditës për të gjithë”, tha tutje avokati i Haradinajt.
