Prezantueset femra në kanalet kryesore të lajmeve në Afganistan dolën në transmetim të dielën me fytyrat e tyre të mbuluara, një ditë pasi kundërshtuan një urdhër taleban për të fshehur paraqitjen e tyre në television, transmeton InLajmi.
Që nga marrja e pushtetit vitin e kaluar, talebanët kanë vendosur një sërë kufizimesh ndaj shoqërisë civile, shumë të përqendruara në frenimin e të drejtave të grave dhe vajzave.
Në fillim të këtij muaji, udhëheqësi suprem i Afganistanit, Hibatullah Akhundzada tha se gratë duhet të mbulohen plotësisht në publik.
Prezantueset e kundërshtuan urdhrin dhe dolën në transmetim me fytyrat e tyre jo të mbuluara, mirëpo më pas ato u detyruan që të veshin hixhabe të plota që ua mbulonin fytyrën dhe ua linin vetëm sytë.
“Ne rezistuam dhe ishim kundër mbajtjes së hixhabeve” tha Sonia Niazi, një prezantuese me TOLOnews.
“Por TOLOnewsit iu bë presion dhe iu tha se çdo prezantuese femër që shfaqet në ekran pa mbuluar fytyrën duhet t’i jepet një punë tjetër ose thjesht të hiqet”, tha ajo.
“TOLOnews u detyrua dhe ne u detyruam ta veshim.”
Prezantueset femra më parë duhej të mbanin vetëm shami.
Drejtori i TOLOnews Khpolwak Sapai tha se kanali ishte “i detyruar” të detyronte stafin e tij të zbatonte urdhrin.
“Na u tha ‘Ju jeni të detyruar ta bëni këtë. Duhet ta bëni. Nuk ka rrugë tjetër’,” tha Sapai, shkruan France.24.
“Dje më kanë thirrur në telefon dhe më kanë thënë me fjalë të rrepta ta bëj. Pra, nuk po e bëjmë me dëshirë por me dhunë”. /InLajmi/
