Kryeministri i Kosovës, Albin Kurti ka takuar profesionistë kosovar në Washington D.C, në këtë takim u bashkëbisedua për rëndësinë e posaçme që ka rrjetëzimi i profesionistëve në mërgatë, ndërtimi i mekanizmave për transferimin e njohurive, ekspertizës dhe burimeve dhe krijimi i instrumenteve për përfshirje aktive në politikat zhvillimore, përcjell InLajmi.
Kurti falënderoi komunitetin shqiptar të Washington D.C. për pritjen, si dhe për dialogun e thelluar mbi mënyrën se si profesionistët e komunitetit mund të kontribuojnë në përparimin e vazhdueshëm të Kosovës.
Tutje i pari i qeverisë theksoi se Qeveria e Republikës së Kosovës vlerëson mërgatën si faktor për zhvillimin e vendit dhe synon të rrisë angazhimin e këtyre profesionistëve në përpilimin e politikave zhvillimore në vend.
Kurti ka theksuar se duhet që ta motivojnë mërgatën për të ardhur dhe kontribuar në Kosovë, sepse sipas tij profesionistët e mërgatës kosovare ndikojnë në rritjen e ekonomisë në vend./InLajmi/
