Bashkimi i Sindikatave të Pavarura të Kosovës (BSPK) është duke mbajtur protestë për miratimin e Ligjit të Pagave, raporton InLajmi.
Kryetari i SBASHK-ut, Rrahman Jashari ka kërkuar nga Qeveria e Kosovës që të miratojë ligjin për paga, gjithashtu ka kërkuar nga ta që të reflektojnë nga kjo protestë dhe të marrin masa.
E kam thënë edhe heren e kaluar edhe tani, BSPK-ja nuk është më e vogël, por është e madhe. Qeveria sot po e sheh se nuk po flet as Atdhe Hykolli as Rrahman Jashari as Sali Gashi, por po flet punëtoria e Kosovës, tha ai.
Sipas Jasharit, është turp që Qeveria e Kosovës po qëndron nën hije, pasi ata po qëndrojnë në Amerikë e gjetkë dhe nuk po merren me të drejtat e punëtorëve.
Qeveri këta janë njerëzit tu, këta i kanë sytë drejt teje, është turp të qëndroni nën hije, të qëndroni nën Amerikë e gjetkë, e mos të dilni këtu e ta thoni të vërtetën para këtyre njerëzve që po rrijnë në diell. Dilni e flisni çka keni për të thënë.
Jashari paralajmëroi se do ketë veprime edhe më të rënda sindikale, të cilat do të çojnë edhe në grevë të përgjithshme nëse nuk aprovohen kërkesat e tyre.
Gjithashtu ai theksoi se sindikatat duan që ligji për paga të hartohet në bashkëpunim me ta.
I lutemi Zotit që të këndelleni. Mas kësaj proteste madheshtore do të ketë veprime edhe më të rënda, të cilat ne nuk i duam, por ju si duket po i doni. Ne e duam ligjin e pagave, por jo që na punon dikush, por që e punojmë edhe ne. Qeveri ose do të bisedojmë ose do të shkojmë në greva të përgjithshme. /InLajmi/
