Kryetari i AAK-së, Ramush Haradinaj, është takuar me Presidentin e Malit të Zi, Milo Gjukanoviq, i cili po qëndron për vizitë në Kosovë, përcjell InLajmi.
Haradinaj, ka thënë se Kosova dhe Mali i Zi do të qëndrojnë përballë njëri tjetrit për çdo rrezik që ka për qëllim destabilizimin e Ballkanit.
Gjithashtu, kreu i AAK-së, e ka falënderuar Gjukanoviqin për mbështetjen e tij për Kosovën dhe gatishmërinë e Malit të Zi për të përkrahur anëtarësimin e Kosovës në organizata ndërkombëtare.
Postimi i plotë i tij:
Kosova dhe Mali i Zi kanë traditë të bashkëpunimit korrekt ndërshtetëror. Në frymën e marrëdhënieve të shkëlqyera mes 2 vendeve tona, kaloi dhe takimi me Presidentin Milo Gjukanoviq.
Bashkë do të qëndrojmë përballë çdo rreziku që ka për qëllim destabilizimin e Ballkanit, bashkë në rrugën euroatlantike, bashkë në agjendat e tjera me rëndësi për të 2-ja shtetet, e po ashtu bashkë do të bëjmë realitet edhe obligimet që kemi marrë, për të përmbyllur me sukses demarkimin e kufirit, me korrigjim në sektorët e caktuar.
Falënderova Presidentin për mbështetjen e vazhdueshme për Kosovën dhe gatishmërinë e Malit të Zi për të përkrahur antarësimin e Kosovës në organizata ndërkombëtare, me theks të veçantë në NATO dhe Këshillin e Evropës. /InLajmi/
