Byroja Kosovare e Sigurimit së bashku me atë të Shqipërisë kanë paralajmëruar se shumë shpejt do të nënshkruajnë një memorandum të mirëkuptimit, i cili synon të përfshijë njohjen reciproke të certifikatave të sigurimit për të 2 vendet, përcjell InLajmi.
Si fokus në memorandumin e ri ndërmjet 2 byrove, do të jetë rritja e bashkëpunimit në fushën e trajtimit dhe pagesës së dëmeve ndaj palëve të 3-ta të dëmtuara në aksidente të komunikacionit.
Ky memorandum është diskutuar ndërmjet drejtorit ekzekutiv të BKS-së Sami Mazrekut dhe drejtoreshes së byros për Shqipëri Anila Hoxhës.
Byroja Kosovare e Sigurimit ka njoftuar se ky memorandum i ri do të nënshkruhet në javët në vijim dhe ka për synim ndërtimin e raporteve sa më të mira mes 2 vendeve.
Njoftimi i plotë nga Byroja Kosovare e Sigurimit:
Në zyrat e Byrosë Kosovare të Sigurimit (BKS), Drejtori Ekzekutiv i BKS Sami Mazreku ka pritur në takim Znj. Anila Hoxha – Drejtore e Përgjithshme e Byrosë Shqiptare të Sigurimit (BSHS), me qëllim të diskutimit lidhur me modalitetin e ripërtëritjes së Memorandumit të Mirëkuptimit mbi njohjen reciproke të certifikatave të sigurimit për të dy vendet, memorandum ky i cili është nënshkruar në vitin 2006. Fokus në memorandumin e ri ndërmjet dy byrove, do të jetë rritja e bashkëpunimit në fushën e trajtimit dhe pagesës së dëmeve ndaj palëve të treta të dëmtuara në aksidente të komunikacionit.
Memorandumi i ri do të nënshkruhet në javët në vijim, në saje të mbylljes së ciklit të nënshkrimit të memorandumeve me të gjitha byrotë e rajonit, në synim të ndërtimit të raporteve sa më të mira me të njejtat, me qëllim të gjetjes së mënyrave alternative për aplikimin e sistemit të kartonit të gjelbër për drejtuesit kosovar të mjeteve motorike. /InLajmi/
