Profesori universitar, Blerim Latifi, thotë se zgjerimi i aktakuzës ndaj ish-krerëve të UÇK-së u bë për të tërhequr vëmendjen nga deklaratat e Dicka Marty, i cili tha se Serbia po tentonte ta vriste.
Goxha jam i bindur, jam i prirur me menduar se zgjerimi i aktakuzës të cilën ne e pamë këto ditë është një përpjekje perfide me largu vëmendjen nga ajo çështje, do të thotë me largu vëmendjen e publikut edhe të Gjykatës sa më shumë nga ai element, i cili faktikisht e vinte një hije të madhe dyshimi mbi krejt këtë Gjykatë, mbi krejt procesin i cili ka sjell deri të formimi i kësaj Gjykate”, tha Latifi.
“Mendoj se dikush nga prokuroria përmes këtij veprimi ka dashur që ta eliminojë krejtësisht atë çështje dhe ta krijojë përshtypjen se Gjykata ka gjetur elemente të tjera. Mendoj se është një lojë goxha perfide në këtë rast”, shtoi ai.
“Ndoshta do të kalojnë më shumë se 2 vjet dhe ne nuk do të shohim fillimin e një procesi gjyqësor ndaj ish-krerëve të UÇK-së i cili do t’i jepte fund një herë e përgjithmonë kësaj drame e cila për mendimin tim, është një dramë e pamerituar jo vetëm për ata që janë atje, por edhe për popullin e Kosovës, edhe për shtetin e Kosovës, sepse në fund të fundit unë konsideroj se krejt kjo është një betejë shumë më e madhe, një betejë që i kapërcen edhe kufijtë e asaj që ne e quajmë drejtësi, edhe ndërkombëtare, edhe vendore e kështu me radhë”, theksoi Latifi.
Ndaj ish-presidentit të Kosovës, Hashim Thaçi, ish-kreut të Partisë Demokratike të Kosovës, Kadri Veseli, ish-anëtarit të Shtabit të Përgjithshëm të UÇK’së, Rexhep Selimi dhe ish-zëdhënësit të UÇK-së, Jakup Krasniqit rëndojnë akuzat për krime lufte dhe krime kundër njerëzimit, shkruan Gazeta Express.
Që nga nëntori i vitit 2020 ata gjenden në paraburgim në Hagë dhe janë deklaruar të pafajshëm për akuzat që rëndojnë ndaj tyre.
