Deputeti nga Lidhja Demokratike e Kosovës, Driton Selmanaj e ka kritikuar Qeverinë e Kosovës për praktikën e miratimit të ligjeve, pasi sipas tij nuk është në rregull aspak që me një ligj të ndryshohen 5 ligje, siç edhe po e praktikon kjo qeveri, raporton InLajmi.
Në fakt unë e kam kundërshtuar disa herë edhe në të kaluarën praktikën që me një ligj të ndryshohen shumë ligje, tash po e shoh që kjo është dukuri e kësaj qeverie, d.m.th. këta nuk e kanë në plan të ndalen me këtë formë të deformuar të ligjbërjes. Duhet ta thjeshtojnë sa më shumë sa më leht dhe sa më shumë që njerëzit kur kanë interes të kuptojnë një të drejtë të tyre dhe ta lexojnë ligjin përkatës dhe jo në ligje të shpërndara”.
Ai iu lut Qeverisë së Kosovës që ta ndryshojnë këtë praktikë, sepse është më e lehtë për qytetarët të kuptojnë një të drejtë të tyre nga ligji përkatës dhe jo me ligje të shpërndara.
“Unë po ju lus ta ndërroni këtë praktikë se me një ligj të vetëm po ndryshohen 5 ligje”.
Sipas Selmanajt, kjo qeveri po i diskriminon veteranët e luftës, pasi po i heq nga rritja e pensionit të tyre si rezultat i rritjes së pagës minimale, madje ai thotë se kjo qeveri po del edhe me një tendencë mashtruese për opinionin kinse ky ndryshim ka ndodhur në ndryshimin e fundit.
“Vlera më sublime e një shoqërie është të vlerësojë ata që kanë kontribuar për lirinë e tyre, e kjo është për veteranët. Në secilën shoqëri kur përmenden veteranët ngriten në këmbë me respektin maksimal për sakrificën që kanë bërë për vendin. Kjo qeveri veteranët e luftës i heq nga rritja e pensionit të tyre si rezultat i rritjes së pagës minimale, me një tendencë për të mashtruar opinionin se kjo ka ndodhur në ndryshimin e fundit”. /InLajmi/
