Presidetja e Kosovës, Vjosa Osmani, ka vizituar qendrën e regjistrimit për refugjatët e luftës së bashku me ministren e Punëve të Brendshme, të Lituanisë, Agnė Bilotaitė, përcjell InLajmi.
Në takim Osmani dhe Bilotaitė, kanë biseduar për refugjatët e ukrainës dhe me organizata humanitare, të cilat po i dalin në ndihmë atyre, shumica nga të cilët janë gra e fëmijë.
Ndërkaq, Presidetja e Kosovës dhe ministrja e Punëve të Brendshme para një grupi akademikësh dhe studentësh kanë diskutuar mbi mbrojtjen e demokracisë, në këtë rajon.
Gjithashtu Osmani tha se Lituania dhe Kosova do të vazhdojnë që ta forcojnë partneritetin dhe ta mbrojnë me çdo kusht lirinë.
Postimi i plotë saj:
Në Vilnius, bashkë me ministren e Punëve të Brendshme, Agnė Bilotaitė, vizituam qendrën e regjistrimit për refugjatët e luftës, ku bashkëbiseduam me refugjatë ukrainas si dhe me organizata humanitare, të cilat po i dalin në ndihmë atyre, shumica nga të cilët gra e fëmijë. Populli i Kosovës e ka përjetuar ngjashëm tmerrin e luftës, gjenocidit dhe dëbimit me dhunë nga shtëpitë e tyre, prandaj u solidarizuam me ukrainasit, krah të cilëve janë bashkuar të gjithë popujt liridashës të botës.
Poashtu, vendosëm kurorë lulesh në kujtim të heronjve që u vranë në përpjekjet e Lituanisë për pavarësi, trimëria e së cilëve hodhi themelet e Lituanisë së sotme liridashëse e demokratike.
Ndërkaq, para një grupi akademikësh dhe studentësh diskutuam mbi mbrojtjen e demokracisë. Lufta barbare dhe gjenocidale e Rusisë në Ukrainë është dëshmi se sistemi ndërkombëtar i bazuar në rregulla, liria dhe sovraniteti, si dhe vlerat tona të përbashkëta demokratike nuk duhen asnjëherë të merren si të mirëqena. Si 2 vende të cilat janë përballur gjatë me agresorë e tiranë, Lituania dhe Kosova do të vazhdojnë që ta forcojnë partneritetin dhe ta mbrojnë me çdo kusht lirinë, demokracinë dhe sovranitetin./InLajmi/
