Kryetari i Partisë Demokratike të Kosovës, Memli Krasniqi ka thënë se aplikimi për anëtarësimin e Kosovës në Këshillin e Evropës është një hap i duhur, përcjell InLajmi.
Krasniqi ka shtuar se si opozitë e mbështesin këtë nismë në të gjithë hapat e ardhshëm në mënyrë që të realizohet sa më parë.
Gjithashtu i pari i PDK-së ka thënë se anëtarësimi i Kosovës në Këshillin e Evropës jo vetëm që e ofron Kosovën me vlerat demokratike evropiane, por i hapë perspektivë të re dhe shumë të nevojshme institucioneve të Kosovës.
Postimi i plotë, i tij:
Aplikimi për anëtarësimin e Kosovës në Këshillin e Evropës është hap i duhur për të cilin s’do të duhej të kishte pasur hamendësim dhe të cilin e kemi kërkuar të ndodhë sa më parë.
E përshëndesim këtë nismë dhe si opozitë do ta mbështesim në të gjithë hapat e ardhshëm këtë proces, në mënyrë që kjo objektivë shtetërore e shoqërore të realizohet sa më parë.
Anëtarësimi i Kosovës në Këshillin e Evropës, jo vetëm që e ofron Kosovën me vlerat demokratike evropiane, por i hapë perspektivë të re dhe shumë të nevojshme institucioneve të Kosovës, qytetarëve dhe shoqërisë tonë në përgjithësi./InLajmi/
