Ministrja e Punëve të Jashtme, Donika Gërvalla, ka vizituar parlamentin e Izraelit, ku është takuar me përfaqësues të ndryshëm të Knesset-it, përcjell InLajmi.
Lidhur me këtë vizitë Ministrja Gërvalla është takuar edhe me Ram Ben Barak, Kryetar i Komisionit për Punë të Jashtme dhe Mbrojtje, ku ajo nënvizoi natyrën e veçantë të marrëdhënieve mes Izraelit dhe Kosovës dhe bëri një përshkrim të mundësive dhe nevojës për zgjerimin e mëtejshëm të tyre në të ardhmen.
Gjithashtu delegacioni i Republikës së Kosovës, e ka përfunduar ditën me një pritje në Ambasadën e Republikës së Kosovës në Jerusalem, ku morën pjesë përfaqësues të ndryshëm të ekonomisë dhe shoqërisë izraelite, si dhe përfaqësues të diasporës shqiptare në Izrael.
Njoftimi plotë nga Ministrja e Punëve të Jashtme:
Në kuadër të vizitës bilaterale në Izrael, Zëvendëskryeministrja dhe Ministrja e Punëve të Jashtme, Donika Gërvalla, vizitoi dje parlamentin e Izraelit ku u takua me përfaqësues të ndryshëm të Knesset-it.
Gjatë takimit me z. Ram Ben Barak, Kryetar i Komisionit për Punë të Jashtme dhe Mbrojtje, ministrja Gërvalla nënvizoi natyrën e veçantë të marrëdhënieve mes Izraelit dhe Kosovës dhe bëri një përshkrim të mundësive dhe nevojës për zgjerimin dhe thellimin e mëtejshëm të tyre në të ardhmen. Theks i veçantë u vu gjatë bisedës në sfidat gjeopolitike të krijuara nga lufta ruse në Ukrainë dhe rrezikun e destabilizimit të Ballkanit Perëndimor.
Rreth një përfshirjeje më të mirë dhe efektive të gjeneratave të ndryshme të diasporës dhe mërgatës, ajo diskutoi me z. Zeev Elkin, Ministër i Jeruzalemit dhe Trashëgimisë. Ministrja Gërvalla theksoi se Kosova mund të përfitojë shumë nga përvoja e gjatë dhe mbresëlënëse e Izraelit në këtë fushë.
Në takimin me z. Ali Salalha, Kryetar i Grupit të Miqësisë Izrael – Kosovë, Ministrja Gërvalla theksoi nevojën e një bashkëpunimi më të dendur parlamentar mes Knesset-it dhe Kuvendit të Kosovës.
Delegacioni i Republikës së Kosovës, e përfundoi ditën me një pritje në Ambasadën e Republikës së Kosovës në Jerusalem, ku morën pjesë përfaqësues të ndryshëm të ekonomisë dhe shoqërisë izraelite, si dhe përfaqësues të diasporës shqiptare në Izrael.
Përfaqësuesja e Republikës së Kosovës në Izrael, znj. Ines Demiri, gjatë fjalës së saj përshëndetëse vuri në pah në veçanti frymën shumë miqësore të marrëdhënieve mes Izraelit dhe Kosovës dhe theksoi potencialin e madh të bashkëpunimit në të ardhmen.
Delegacioni i Republikës së Kosovës gjatë vizitës në 3-ditore në Izrael ishte i shoqëruar edhe nga Ambasadorja e Izraelit për Kosovën, znj. Tamin Ziv dhe drejtori për Ballkanin pranë Ministrisë së Jashtme të Izraelit, z. Dani Oryan.
Në përmbyllje të vizitës në Izrael, delegacioni i Republikës së Kosovës vizitoi qendrat historike dhe arkeologjike të Jerusalemit. Nga Izraeli, Zëvendëskryeministrja Gërvalla ka udhëtuar për në Bruksel dhe do të marrë sot në darkën e organizuar nga Përfaqësuesi i Lartë i Politikës së Jashtme të BE-së Josep Borrell me krerët e shteteve të Ballkanit Perëndimor./InLajmi/
