Ministri i Jashtëm i Serbisë, Nikola Selakoviq ka thënë se Perëndimi do të kërkojë nga vendi i tij që ta njohë Kosovën, në mënyrë që sipas tij t’i thonë presidentit rus Vladimir Putinit se nuk ka precedent ligjor.
Ai theksoi se duhet të luftojë për interesat e saj në Kosovë.
“Ne duhet të luftojmë për interesat tona në Kosovë, interesat e shtetit të Serbisë, për interesat e popullit serb, nuk e di nëse shteti ka luftuar ndonjëherë më me sukses në këtë periudhë 23 vjeçare se sa në këto 10 vjet, dhe hapësira jonë për manovrim është e pakrahasueshme”, tha ai për RTS Serbia.
Selakoviq tha mes tjerash se ka interesim të Kosovës për t’u anëtarësuar në Këshillin e Evropës, transmeton Klan Kosova.
“Atyre iu tingëllon bukur që t’ua shesin historinë votuesve të tyre, kjo është diçka si BE. Rusia nuk është më në Këshillin e Evropës, vendoset me shumicë të thjeshtë. Nuk është sekret, Prishtina ka në anën e saj shumicën e shteteve anëtare të Këshillit të Evropës, por nuk ka në anën e saj parimet që duhet t’i ketë dikush që duhet të anëtarësohet. Kushdo që mendon se do të rrimë duarkryq për shkeljen e marrëveshjeve të Uashingtonit dhe të Brukselit gabon, nuk do ta bëjmë. Çdo politikë e mundshme e mbrojtjes së interesave të shtetit të Serbisë dhe të popullit serb në Kosovë do të aktivizohet”, u shpreh Selakoviq
