Profesori universitar, Blerim Latifi ka kritikuar udhëheqësit e Kosovës, të cilët po vizitojnë vendet që na kanë njohur, e që sipas tij kjo është vetëm humbje kohe, përcjell InLajmi.
Sipas Latifit, vizitat në këto shtete, të cilat nuk kanë asnjë ndikim në zhbllokimin ndërkombëtar të Kosovës nuk përbëjnë diplomaci.
Ai tha se udhëheqësit shtetërorë vetëm po shpenzojnë para koti dhe po mashtrojnë veten kinse po bëjnë diçka.
Profesori thotë se diplomaci quhet kur udhëheqësit shtetërorë ia dalin t’i prekin 5 shtetet e BE-së dhe vendet që nuk na kanë njohur, pasi sipas tij aty është shkaku i bllokimit të procesit të avancimit të subjektivitetit ndërkombëtar të Kosovës dhe shkaku i manovrave të vazhdueshme të Serbisë kundër shtetit tonë.
Latifi thotë se si popull jemi dembela dhe krejt jeta na shkon duke shikuar se kush po na ndihmon. Gjithashtu ai thekson se shumica e udhëheqësve mezi presin që Amerika të na i kryejë punët dhe ata të vrapojnë t’i marrin meritat.
Postimi i plotë i tij:
Diplomaci e Kosovës nuk quhet të vizitosh vendet që na kanë njohur prej kohësh, e me të cilat nuk ke asnjë çështje të hapur dhe ndikimi i tyre në zhbllokimin ndërkombëtar të Kosovës është i barabartë me zero.
Kjo është humbje kohe, shpenzim i kotë i pareve të shtetit dhe mashtrim i vetes se po bëjmë diçka.
Diplomaci e Kosovës nuk quhet të shetitemi atyre rrugëve që na i kanë hapur të tjerët, e t’i takojmë ata miq që na i kanë kriju të tjerët, pa qenë të zotë të hapim rrugë të tjera e të krijojmë miq të rinj.
Diplomaci e Kosovës quhet ajo që ia del t’i prekë shtetet që nuk na kanë njohur, e në rend të parë pesë shtetet e Bashkimit Europian, sepse aty është shkaku i bllokimit të procesit të avancimit të subjektivitetit ndërkombëtar të Kosovës dhe shkaku i manovrave të vazhdueshme të Serbisë kundër shtetit tonë.
Por kësaj pune nuk ia themi dot, sepse jemi dembela, krejt jeta na shkon duke shiku kush po na e jep ndonjë ndihmë dhe në fund flemë të qetë me mendimin se Amerika ka me na i kry punët, e neve na mbetet veç me vrapu me i rrëmby meritat, të cilat, pastaj, i përdorim në kacafytjet e brendshme politike për pushtet. /InLajmi/
