Koreja e Veriut ka lëshuar një raketë balistike nga një nëndetëse në det në brigjet lindore të gadishullit, sipas Koresë së Jugut dhe Japonisë.
Nëse konfirmohet, do të ishte lëshimi i fundit në një seri testesh raketore nga Pyongyang
Ajo vjen vetëm disa ditë para inaugurimit të presidentit të ri të Koresë së Jugut, Yoon Suk-yeol, i cili është zotuar të mbajë një linjë më të fortë me Veriun.
Ministri japonez i mbrojtjes e quajti nisjen një kërcënim të papranueshëm për komunitetin ndërkombëtar.
Ministri, Nobuo Kishi, u tha gjithashtu gazetarëve se Japonia do të vazhdojë të “forcojë në mënyrë drastike aftësitë e mbrojtjes”.
Të premten, Departamenti Amerikan i Shtetit paralajmëroi se Koreja e Veriut mund të përgatitet për të kryer një test të armëve bërthamore, i pari i tij në pesë vjet.
Jean Mackenzie i BBC’së në Seul thotë se koha e lëshimit të fundit është veçanërisht e rëndësishme dhe ushtron presion mbi udhëheqësin e ardhshëm të Koresë së Jugut.
Ai do të betohet në detyrë të martën dhe është planifikuar të takohet me Presidentin e SHBA’së, Joe Biden, në Seul më 21 maj.
Burimet e inteligjencës amerikane dhe koreano-jugore besojnë se një provë bërthamore e Koresë së Veriut mund të ndodhë në mes të këtyre dy ngjarjeve.
Muajin e kaluar, udhëheqësi i Koresë së Veriut, Kim Jong-un u zotua të rrisë programin e armëve bërthamore të vendit të tij, transmeton Gazeta Metro.
Ai po fliste në një paradë të madhe ushtarake për të shënuar përvjetorin e themelimit të forcave të armatosura, në të cilën u shfaqën raketat balistike ndërkontinentale të ndaluara.
