Në kuadër të ditës së lindjes së heroit kombëtar Gjergj Kastriotit Skënderbeut, kryeministri i vendit Albin Kurti ka thënë se Skendërbeu është ikona e identitetit shqiptar, si dhe simbol i denjë i gjallërisë së kombit tonë, përcjell InLajmi.
Kurti theksoi se flamuri i kombit tonë mban edhe sot me krenarin simbolikën e tij.
Tutje, ai tha se Skënderbeu është dëshmia jonë historike për tërë botën se liria është vlera më e rëndësishme e njeriut dhe e popullit.
Kryeministri shtoi se sa herë që cenohet liria , populli është i gatshëm të hidhet në luftë çlirimtare, e këtë dëshmoi edhe Ushtria Çlirimtare e Kosovës.
Kurti tha se edhe sot në dekadën e 2-të të shekullit XIX po rrezikohet liria e popujve. Ai theksoi se edhe rreziqet ndaj lirisë dhe sovranitetit popullor nuk mungojnë as në rajonin tonë.
Postimi i plotë i tij:
Sot shënojmë ditën e lindjes së heroit tonë kombëtar, Gjergj Kastrioti-Skënderbeu. Ai është ikona e identitetit shqiptar, simbol i denjë i gjallërisë së kombit tonë dhe i dëshirës sonë për liri!
Flamuri i kombit tonë mban edhe sot me krenari simbolikën e tij. Skënderbeu është dëshmia jonë historike për tërë botën se liria është vlera më e rëndësishme e njeriut dhe e popullit. Kur liria cenohet, populli hidhet në luftë çlirimtare me gjithçka ka, paçka fuqisë më të madhe të pushtuesit. Këtë e dëshmuan në shek. XX përpjekjet e kombit shqiptar për çlirim e bashkim kombëtar, veçanërisht epopeja e Luftës së Ushtrisë Çlirimtare të Kosovës.
Për fat të keq, liria e popujve po rrezikohet sërish në dekadën e dytë të shek. XXI, në një kohë kur dukej se aspiratat për paqen dhe begatinë afatgjatë të kontinentit po bëheshin realitet. Rreziqet ndaj lirisë dhe sovranitetit popullor nuk mungojnë as në rajonin tonë. Prandaj, kujtesa jonë për Skënderbeun, si mbrojtës së lirisë së popullit të tij dhe i Perëndimit në kushtet e shek. XV është aktuale dhe frymëzon veprimtarinë tonë shtetërore e politike. /InLajmi/
