Kryeministri i Italisë, Mario Draghi, në adresimin e tij të sotëm para Parlamentit Evropian ka folur për të ardhmen e Bashkimit Evropian dhe ka thënë se shpreson për një përshpejtim të procesit të zgjerimit.
Veç të tjerash, ai tha se kërkesave për anëtarësim të Bosnjë e Hercegovinës dhe Kosovës duhet t’u kushtohet vëmendje serioze.
“Ne jemi në favor të pranimit të të gjitha këtyre vendeve. Dhe ne duam Ukrainën në Bashkimin Evropian”, deklaroi kryeministri italian, Mario Draghi.
Kreu i qeverisë italiane bëri thirrje për hapjen e menjëhershme të negociatave të anëtarësimit me Shqipërinë dhe Maqedoninë e Veriut, si dhe një moment të ri në bisedimet me Serbinë dhe Malin e Zi, transmeton Zëri.info.
“Integrimi i plotë i vendeve me ambicie evropiane nuk përbën kërcënim për projektin evropian, por është pjesë e realizimit të tij”, u shpreh ai në këtë fjalim.
