Profesori universitar Milazim Krasniqi, ka folur për relacionin e shqiptarëve me fenë përgjatë historisë.
Në këtë kontekst, Krasniqi tha se shqiptarët duke qenë një nga popujt më të vjetër të Evropës kontaktet e para me besimet fetare i kanë shumë të hershme.
“Populli ynë duke qenë një nga popujt më të vjetër të Evropës dhe të Ballkanit gjë për të cilën ka konsensus tek shumica e historianëve seriozë, atëherë sigurisht se kontaktet me besimet fetare i ka shumë të hershme. E para politeizmi antik grek i ka pasur sigurisht ndikimet tek ilirët dhe ka shumë fakte edhe për besimet e adaptuara politeiste që i kanë pasur ilirët, mandej në periudhën e krishterimit Pali thotë se e kam përhapur lajmin e gëzueshëm deri në ilirik, a ka hy në ilirik a nuk ka hy, por deri në ilirik po, që do të thotë në shekullin e parë të krishterimit ilirët kanë qenë në kontaktet e para me krishterimin” tha Krasniqi.
Krasniqi tha se kalimi masiv i shqiptarëve të Kosovës dhe Maqedonisë së sotme në islam ka qenë reagim ndaj terrorit që Kisha Ortodokse Serbe ka ushtruar ndaj tyre.
“Krishterimi e ka historinë e vetë. Për shembull që deri në Ediktin e Milanos në vitin 313 ka qenë fe e ndaluar dhe të krishterët kanë qenë kategoria më e persekutuar e njerëzve në atë periudhë prej Neronit dhe prej Deoklicianit e të tjerëve, kështu që mbas Ediktit të Milanos vjen Koncili i Nikesë në vitin 325 kur legalizohet krishterimi dhe bëhet fe zyrtare e Perandorisë Romake të lindjes. Dhe pastaj fillon edhe jeta e ilirëve që kanë qenë pjesë e asaj perandorie. Në vitin 1054 ndahet kisha në 2 kisha të mëdha”.
“Kjo ka pasur reperkusione të mëdha për ilirët ose arbërorët më vonë, sepse vija e ndarjes ka rënë nëpër territoret e tyre dhe në fakt shumica e historianëve thonë që pjesa më e madhe e ilirëve ka rënë nën sundimin e Bizantit dhe kishës lindore. Ashtu që kjo është pastaj një histori e gjatë e sundimit të kishës bizantine, pastaj kishës bullgare, nja 2 shekuj prej vitit 850, pastaj është rikthyer përsëri kisha bizantine, pastaj është fut kisha serbe ashtu që ilirët më vonë arbërorët kanë jetuar gjatë në këtë”.
“Periudha e sundimit serb pastaj është periudhë shumë morbide, sepse në zakonikun e Car Dushanit, thuhet se zakoniku bëhet për krishterimin, përkatësisht për pastrimin e krishterimit dhe pastrimi nënkupton dëbimin e katolikëve dhe bogumilëve kështu që ka qenë një përndjekje e tmerrshme e shqiptarëve që kanë qenë të besimit roman. Prandaj kjo ka qenë një periudhë e një traume shumë të madhe, sepse zakoniku i Car Dushanit kërkon që të gjithë në kishën serbe të deklarohen si serbë, pastaj ka ardhur periudha e rënies së shtetit të Dushanit dhe rënies së shtetit serb. Ardhja e osmanëve dhe kështu fillojnë kontaktet e shqiptarëve me islamin, kalimi masiv i shqiptarëve realisht masiv i shqiptarëve në islam në Kosovë dhe Maqedoninë e sotme ka qenë si reaksion ndaj largimit nga Kisha Ortodokse Serbe dhe terrori që është ushtruar brenda saj, ky është interpretimi i saktë 100% ”, tha Krasniqi në emisionin Rubikon.
Krasniqi shtoi se përvojat e hidhura të shqiptarëve me religjionin kanë ndikuar në krijimin e mekanizmave të tolerancës ndërfetare, shkruan Klan Kosova.
“Përvojat e tona, sepse e thash përndjekja e krishterëve në Perandorinë Romake ka qenë barbare, pastaj ilirët dhe arbrit në Perandorinë e Bizantit u është imponuar, kisha bullgare ka bërë presion për bullgarizim, pastaj kisha serbe, pra në vetëmbrojtje shqiptarët kanë krijuar mekanizma të tolerancës”.
