Kryetari i PDK-së Memli Krasniqi në 6 vjetorin e anëtarësimit të Kosovës në UEFA, ka kujtuar edhe të ndjerin Fadil Vokrri icili dha shumë për futbollin kosovar, përcjell InLajmi.
Krasniqi tha se meritat më të mëdha i takojnë Fadil Vokkri.
Ai shtoi se ka qenë kënaqësi e jashtëzakonshme që një pjesë të rrugëtimit dhe lobimit për pranimin e FFK-së në UEFA e kanë bërë së bashku me Fadilin.
Postimi i plotë i tij:
Sot bëhen 6 vjet, nga 3 maji i vitit 2016, kur Kosova u bë anëtare e plotë e shtëpisë më të madhe të futbollit evropian, UEFA, duke shpërthyer kështu izolimin shumëvjeçar të futbollit kosovar.
Padyshim, meritat më të mëdha për këtë sukses historik që ia mundësoi Kosovës përfaqësimin dhe garimin në arenën ndërkombëtare në sportin më të popullarizuar në botë, i ka ish-presidenti historik i Federatës së Futbollit, Fadil Vokrri.
Ka qenë kënaqësi e jashtëzakonshme që një pjesë të rrugëtimit dhe lobimit për pranimin e FFK-së në UEFA e kemi bërë së bashku me Fadilin, mikun dhe bashkëpunëtorin tim të afërt për më shumë se tri vjet sa isha Ministër i Kulturës, Rinisë dhe Sportit.
Sot, yjet e kombëtares së Kosovës po shëndritin nëpër ligat më të mëdha të futbollit në botë, duke ngritur lartë ngjyrat dhe vlerat e shtetit tonë. Urojmë që këtë vit, në kuadër të Ligës së Kombeve, Kosova të arrijë suksesin e kërkuar e të merituar për kualifikim në Euro 2024. /InLajmi/
