Deputeti i Lidhjes Demokratike të Kosovës, Armend Zemaj ka uruar punëtorët në ditën ndërkombëtare të tyre, duke thënë se punëtori duhet respektuar e nderuar, përcjell InLajmi.
Gjithashtu Zemaj ka thënë se qeveria e tanishme po e pamundëson garën e drejtë për punësime ndërsa kushtet nuk as nuk po vihen në plan të rishikimit.
Sipas deputetit qeveria ka larguar nga puna më shumë se 575 profesionistë shëndetësorë, dhe nuk ka miratuar Ligjin e Pagave, ndërsa pagesat ndaj punëtorëve kanë arritur në nivel lëmoshe.
Postimi i plotë i tij:
Urime 1 Majin, Ditën Ndërkombëtare të Punëtorëve!
Djersa e punëtorit duhet respektuar e nderuar, kushtet e tyre të punës duhet plotësuar, ndryshe, shenjtëria e kësaj djerse të ndëshkon.
1 Maj 2022 ka këtë epilog: mosrespektim të theksuar të djersës së punëtorit, mosvlerësim të punës së tyre, kushte më të vështira e padëgjueshmëri totale qeveritare ndaj zërit dhe të drejtave të tyre.
Kjo Qeveri po u pamundëson edhe garën e drejtë për punësime e lëre më kushtet e punës; në konkursin e KEK-ut aplikuan 4668 persona, ndërsa u pranuan 128 prej tyre, dhe që të gjithë familjarë të zyrtarëve të kësaj ndërmarrjeje dhe militantë e të afërm të pushtetit.
Ishte kjo Qeveri që i kishte larguar nga puna më shumë se 575 profesionistë shëndetësor, të cilët ishin në luftë të përhershme me COVID-19.
Është kjo Qeveri e cila ende nuk e ka miratuar Ligjin e Pagave, ndërsa rritjen e pagës minimale e ka rritur deri në nivel lëmoshe.
Është kjo Qeveri që me veprimin dhe mosveprimin e saj po i inkurajon qytetarët që ta lëshojnë vendin.
Është paaftësia qeverisëse ajo që po i thellon krizat, përkatësisht atë të rritjes së çmimeve të produkteve. Aty ku nuk ka krizë po e krijon një të tillë, ndërsa çmimin padyshim që e paguajnë të gjithë, me theks të veçantë ata që janë në marrëdhënie pune si dhe ata që synojnë të gjejnë një vend pune.
Në paaftësinë qeverisëse vend qendror zë padëgjueshmëria!/ InLajmi/
