Ministri i Punëve të Brendshme, Xhelal Sveçla është duke raportuar për sulmet e fundit ndaj Policisë së Kosovës në Komisionin për Çështje të Sigurisë dhe Mbrojtjes, raporton InLajmi.
Sipas Sveçlës, këto sulme ndaj Policisë së Kosovës kanë një prapavijë tjetër, pasi synojnë të shkaktojnë panik te qytetarët dhe të destabilizojnë vendin.
Brenda 10 ditësh Policia e Kosovës është sulmuar 6 herë dhe këto veprime konsiderojmë se janë nxitur për shkak të shtrirjes së ligjmërisë në atë pjesë. Këto sulme mbi të gjitha kanë prapavijë tjetër që synojnë të shkaktojnë panik në vendin tonë e te qytetarët dhe të destabilizojnë vendin”, tha Sveçla.
Sveçla ka thënë se është rritur aktiviteti hetues në ato zona, duke theksuar se ka rënie evidente edhe të kontrabandës.
“Ka rënie evidente të kontrabandës”, ka thënë Sveçla.
Ministri tha se Policia e Kosovës po ballafaqohet me vështirësi të madhe, krejt kjo si pasojë e mosfunksionalizimit të Organit Shqyrtues të Prokurimit.
“Policia e Kosovës ballafaqohet me vështirësi të mëdha, shpesh të paarsyeshme. Sa i përket uniformave, armatimit, shumë nga këto kanë rrjedhur si pasojë e OSHP-së. Unë shpresoj që shpejt OSHP-ja do të zhbllokohet”, ka thënë Sveçla. /InLajmi/
