Ish-kryeministri i Kosovës, Avdullah Hoti ka njoftuar se ka realizuar një takim me ish-ministrin e Jashtëm të Çekisë, Karel Schwarzenberg, përcjell InLajmi.
Hoti tha se Schwarzenberg ka qenë bashkëpunëtori kryesor i ish-Presidentit të Çekisë, Václav Havel, si dhe mik i ish-pesidentit Ibrahim Rugova.
Gjithashtu ai tha se Schwarzenberg ka mbështetur bombardimet e NATO-s në Kosovë.
Deputeti i LDK-së theksoi se bashkë me ish-ministrin çek kanë diskutuar për mbështetjen që i duhet tani Kosovës për anëtarësim në Këshillin e Evropës dhe në Programin e Partneritetit për Paqe të NATO-s.
Sipas Hotit, Qeveria e Kosovës duhet urgjentisht të intensifikojë bashkëpunimin me Çekinë, pasi ajo së shpejti do të marrë kryesimin e BE-së, duke theksuar se edhe ai së bashku me LDK-në do të kontribuojnë në këtë drejtim.
Postimi i plotë i tij:
Sot, pata nderin të takohem me z. Karel Schwarzenberg, ish Ministër i Jashtëm i Çekisë kur Kosova e ka shpallur pavarësinë. Ai ka qenë bashkëpunëtori kryesor i ish-Presidentit të Çekisë, Václav Havel, një njeri i madh dhe mik i Presidentit Historik Dr.Ibrahim Rugova, që mbështeti bombardimet e NATO-s dhe bëri vizitën e parë si President i një shteti pas lufte në Kosovë.
Në procesin e shtetndërtimit të Kosovës miqtë sikur Schwarzenberg kanë vend të veçantë. I shpreha mirënjohjen tonë për kontributin e tij në kohën sa ishte Ministër dhe deputet.
Ai edhe sot vazhdon të mbështesë paqen dhe integrimin euro-atlantik të Republikës së Kosovës. Biseduam për mbështetjen që na duhet tani për anëtarësim në Këshillin e Evropës dhe në Programin e Partneritetit për Paqe të NATO-s. Partia që ky e ka themeluar dhe udhëhequr është në qeverisje dhe udhëheq me Parlamentin. Çekia pritet të marrë së shpejti kryesimin e BE-së, prandaj Qeveria e Kosovës duhet urgjentisht të intensifikoj bashkëpunimin me Çekinë. LDK-ja dhe unë personalisht do të jemi në dispozicion për të ndihmuar me lidhjet dhe miqësitë që i ka krijuar Presidenti Rugova, të cilat po i vazhdojmë edhe tani që jemi në opozitë.
Kosova është e bekuar me miqtë e saj!
Zoti i bekoftë miqtë tanë! /InLajmi/
