Një delegacion i deputetëve të Kosovës është duke marrë pjesë në punimet e Sesionit të 2-të Plenar të Asamblesë Parlamentare të Këshillit të Evropës që zhvillohet nga data 25 deri më 29 prill.
Deputetja Ariana Musliu-Shoshi, e cila është pjesë e këtij delegacioni, ka thënë se prezenca e Kosovës në Asamblenë e KE-së është shumë e rëndësishme, veçanërisht pas pushtimit rus në Ukrainë dhe efekteve globale që ka shkaktuar kjo.
“Prezenca e Kosovës në Asamblenë e Këshillit të Evropës që është institucion tejet i rëndësishëm në ditët e sotme ku po përballemi me shumë tema që lidhen me Rusinë dhe Ukrainën. Është jashtëzakonisht e rëndësishme që Kosova të ketë zërin e saj këtu. Mund të them që është ndër kohët më të rëndësishme kur Kosova është prezent këtu, sepse të gjitha delegacionet që janë prezente ndjejnë dhimbje me popullin e Ukrainës dhe në të njëjtën kohë kujtohen vuajtjet e popullit shqiptar të Kosovës”.
“Si delegacion kemi pasë dhe vazhdojmë të kemi edhe takime të tjera me një agjendë mjaft të ngjeshur. Deri më tani kemi pasë takim me përfaqësuesit e SHBA-së dhe Mbretërisë së Bashkuar, derisa tani do të takohemi me përfaqësuesit e Italisë dhe Gjermanisë. Takime kemi pasë edhe me përfaqësuesit e vendeve mosnjohëse siç është Greqia dhe Ukraina. Në takimet tona kemi lobuar dhe adresuar kërkesën tonë primare si shtet që është anëtarësimi në Këshill të Evropës”.
Deputetja e PDK-së, në një lidhje për “Info Magazine” të Klan Kosovës, tha se asnjëherë nuk ka pasë klimë më të përshtatshme për aplikimin e Kosovës për anëtarësim në Këshill të Evropës.
“Në historinë e Asamblesë së Këshillit të Evropës asnjëherë nuk ka pasë një klimë më të mirë për Kosovën. Nuk ka qenë asnjëherë momentum më i mirë për Kosovën. Ne kemi edhe periudhën prej vitit 2014 deri në vitin 2016 kur Rusia nuk ka qenë anëtare e Asamblesë së Këshillit të Evropës, por ka qenë në komitet të ministrave. Sot ka qenë edhe një raport me Komitetin për Politikë dhe Demokarci ku një ndër pikat ka qenë që të konsiderohet edhe anëtarësimi i Kosovës në këtë institucion. Nga takimet që kemi pasë shihet gatishmëri për kërkesën tonë për anëtarësim të plotë në këtë organizatë. Është me rëndësi që Kosova përmes mekanizmave të vet, posaçërisht përmes ministrisë së Punëve të Jashtme, që të veprojë sa më shpejt që është e mundur në aplikim”.
