Kryeministrja e Serbisë, Ana Bërnabiq, ka thënë se në secilin takim që e kanë me zyrtarë amerikanë, më haptas se kurrë më parë, po ju kërkohet njohja e ndërsjellë me Kosovën.
Kështu ndodhi edhe kur të martën në Beograd qëndroi ndihmëssekretarja e shtetit amerikan, Karen Donfried.
“Karen Donfried dhe të gjithë të tjerët që vijnë për vizitë nga Shtetet e Bashkuara të Amerikës, na thonë direkt se qëllimi është njohja e ndërsjellë, pa dyshim. Veçse ka një ndryshim tani, amerikanët po dëgjojnë palën tonë dhe argumentimin që e kemi. Pas takimit që e kisha me delegacionin amerikan, fola me presidentin Vuçiq e i thashë se po më vlon koka nga tensionet”, tha Bërnabiq.
Me homologun nga Kosova, kryeministrja serbe duket se është acaruar fort, transmeton Klan Kosovova.
“Nëse duam që në këtë mënyrë të flasim e bëjmë politikë atëherë mendimi qëndron plotësisht se Albin Kurti është ‘Hitler i vogël’ sepse ai përfaqëson krejt ato teza që nazistët i kanë përfaqësuar gjatë Luftës së Dytë Botërore. Ai t’i ndjekë krejt serbët nga Kosova dhe ua mohon të drejtat elementare siç është e drejta e votimit. Ai do që të ashtuquajturën Republikë të Kosovës ta bashkojë me Shqipërinë e ta themelojë ‘Shqipërinë e Madhe’”, tha ajo.
