Prishtina do të jetë në testim edhe sot për shndërrimin e unazës qendrore të kryeqytetit në qarkore njëkahëshe për automjetet. Testimi është bërë edhe gjatë ditës së djeshme me ç’rast janë krijuar kolona të gjata.
Lidhur me këtë asambleisti i opozitës në këtë Komunë, Gëzim Sveçla tha se ky vendim nga i pari i Prishtinës Përparim Rama është marrë nga presioni publik për mos punë ndaj komunës së Prishtinës “nevoja për tu dukur se po bëhet diçka”.
“Është një vendim i ngutshëm dhe i paplanifikuar mirë dhe që rezultojë me vikendin më të ngarkuar qe një kohë të gjatë.
“Besoj që ky vendim ka ardhur si pasojë e rritjes së presionit publik për mospunë ndaj komunës së Prishtinës dhe nevoja për t’u dukur se po bëhet diçka rezultoi me këtë ide e cila vështirësoi dje qarkullimin nëpër krejt qytetin e Prishtinës dhe paraqiti pengesa të mëdha tek qytetarët e Prishtinës”.
Tutje, Sveçla shtoi se ka munguar një fushatë sensibilizuese për këtë veprim, pasi se sipas tij qytetarët nuk kanë qenë të informuar mjaftueshëm, teksa theksoi që kjo analizë nuk mund të japë një rezultat të saktë se si do të jetë kjo gjatë ditëve të punës, pasi që kryeqyteti nuk ka probleme vikendeve me kolona.
“Mendoj se ka munguar një fushatë sensibilizuese për këtë veprim që do të ndërmarrët, është bërë publike 2 apo 3 ditë para zbatimit të tij. Pastaj dihet mirëfilli se në Prishtinë asnjëherë nuk ka problem në komunikacion gjatë vikendit dhe mendojë që kjo analizë nuk mund të japë një rezultat të saktë se si do të jetë kjo gjatë ditëve të punës. Çështje tjetër është se Komuna e Prishtinës e ka prezantuar një trajektore tjetër se si do të zhvillohet komunikacioni për vikend, mirëpo dje në mëngjes në vikend kemi pasur një rrugë tjetër . Është ndryshuar trajektorja e paraparë dhe në këtë drejtim mendojë se ka qenë një test i dështuar”.
Asamblisti i Vetëvendosjes u shpreh që Komuna e Prishtinës duhet të zbatojë Planin e Mobilitetit të Qëndrueshëm urban i cili është përpiluar nga ekspert të jashtëm dhe i cili përmban mjaft sugjerime për rregullimin e komunikacionit në Prishtinë.
“Komuna e Prishtinës duhet të zbatojë Planin e Mobilitetit të Qëndrueshëm urban i cili është në dokument, analizë e porositur dhe kontraktuar nga Komuna e Prishtinës, e përpiluar nga ekspert të jashtëm dhe i cili përmban mjaftë sugjerime se çfarë duhet bërë edhe në kuptimin e rregullimit të komunikacionit në Prishtinë. Zakonisht nëpër botën modern testet bëhen nëpër laboratorët modern e ku subjekt janë minjtë, mirëpo këtë vikend Prishtina i ngjante një laboratori të madh, ndërsa objekt hulumtimi qytetarët e Prishtinës”.
E 2 nga qytetarët e Prishtinës treguan për përvojat e tyre në këto 2 ditë sa ishin duke u bërë testimet për unazën e kryeqytetit.
Qytetari Sokol Haliti tha se kjo formë e testimit po bënë bllokadë të madhe në kryeqytet dhe se pengesa për lëvizje është mjaft e madhe.
“Pengesa është boll, kjo rruga çarkore po pengon. Me pas lënë nga ‘Garibaldi’ siç ka qenë plan më parë kish qenë shumë më mirë. Kështu shumë bllokadë të madhe po bëjnë. Shpresojnë të hënën mos ta lënë kështu”.
Kurse Agim Maloku tha se qytetarët janë bllokuar pasi që nuk kanë qenë të informuar që do të bëheshin testime, shkruan Ekonomia Online.
“Njerëzit dje bllokoheshin se nuk e kanë ditur. Vinin nga Fushë-Kosova dhe e ngatërronin rrugën. Ka qenë e shtunë, se me pasë qenë ditë pune e javës, kishte qenë edhe më vështirë. Bllokoheshi.njerëzit, ankoheshin. Prej Hotel ‘Prishtinës’ deri te “Santea” për me u lidh tek semafori bëhej kolona”.
