Ministria e Arsimit, Shkencës dhe Teknologjisë Arbërie Nagavci në Ditën Botërore të Librit ka kujtuar periudhat e vështira kohore kur kishin mungesa të librave të përkthyer në gjuhën shqipe, përcjell InLajmi.
Nagavci po ashtu ka treguar se si kjo ditë i sjellë në mend shkrimtarët më të mëdhenj të të gjitha kohërave që i dhanë ngjyra jetës dhe kurajo botës.
Ajo gjithashtu tha se mësimdhënësit bashkë me prindërit duhet të mundohen që fëmijët mos të lexojnë vetëm libra shkollor por edhe libra të tjerë që të zhvillohen në pjesën arsimore dhe kulturore.
Postimi i plotë i saj:
Dita Botërore e Librit rikthen kujtimet tona në periudha të vështira, kur kishim mungesë të librave, numër të vogël të librave të përkthyer, por edhe libra të ndaluar. Kjo është historia e dhimbshme e shqiptarëve në raport me librin.
Por, kjo ditë, po ashtu, na i sjellë në mend shkrimtarët e mëdhenj të kohërave që i dhanë ngjyra jetës dhe kurajo botës përmes letërsisë për të luftuar të keqen, duke nxitur edhe zhvillimin e njerëzimit dhe përpjekjet për një botë më të mirë.
Mësimdhënësit, bashkë me prindërit dhe gjithë komunitetin, duhet të shtojnë përpjekjet që të nxisin gjeneratat e reja për lexim, jo vetëm të librave shkollor. Libri, si një nga mjetet më të vjetra të komunikimit, mbetet një nga mundësitë më të mira për zhvillim arsimor e kulturor, por edhe për kënaqësi shpirtërore. /InLajmi/
