Deputeti Arben Gashi nga rradhët e LDK-së e ka komentuar situatën e kërkimi të komisionit hetimor nga opozita drejt pushtetit, duke thënë se çdo ditë e më shumë po shtohen faktet dhe arsyet për formimin e këtij komisioni, përcjell InLajmi.
Po ashtu Gashi ka përkrahur plotësisht formimin e komisionit hetimor sepse sipas tij mësohen të vërtetat dhe hiqen ose vërtetohen dyshimet e opozitës ndaj pushtetit të tanishëm.
Tutje deputeti i LDK-së, ka thënë se Qeveria e Kosovës ka dëshmuar se e shkelë Kushtetutën dhe e mohon demokracinë duke u bazuar edhe në moslejimin e krijimit të komisionit hetimor.
Postimi i plotë i tij:
Nga dita që kërkuam krijimin e Komisionit Hetimor Parlamentar për Energjinë e deri me sot, faktet që kemi të drejtë po shtohen përditë. Arsyeshmëria po rritet e bindja po forcohet. Edhe pse e drejta politike, kushtetuese dhe ligjore e opozitës nga pushteti po sfidohet, ajo nuk do të mposhtet assesi. Komisioni hetimor do të bëhet. Ky pengim i pushtetit mund të sjellë vonim, por tashmë faji ka adresë, sepse nuk është “jetim”, pushteti është fajtor. Ikja nga hetimi është vetë përgjigjja.
Me krijimin e komisionit mësohet e vërteta, hiqen ose vërtetohen dyshimet për keqpërdorim apo korrupsion, për paaftësi apo keqmenaxhim. Por, një gjë është e paevitueshme: faji që e bën pushtetin fajtor, në cilindo rast. Ky pushtet i ka dhënë më shumë se 100 milion euro dhe e ka rritur faturën e energjisë elektrike për 100%, të cilat qytetarët po vazhdojnë t’i paguajnë. Kjo është një padrejtësi e shtrenjtë dhe çmim i papërballueshëm për qytetarët.
Për më tepër, me krijimin e komisionit respektohet Kushtetuta dhe demokracia, ngase përmbushet njëra ndër tre shtyllat e funksionimit të parlamentit: Mbikëqyrja.
Ndonëse e keni dëshmuar se Kushtetutën e shkelni dhe demokracinë nuk e respektoni, ne nuk do të ndalemi deri në krijimin e komisionit hetimor parlamentar./InLajmi/
