Rita Ora ka shpërthyer në lot teksa ka folur për betejën e nënës së saj me kancerin e gjirit në episodin e së mërkurës në “The Voice Australia”.
Ylli 31-vjeçar i muzikës pop u emocionua nga historia e konkurrentes Aleisha Gam, e cila kishte dhënë disa detaje për betejën me kancerin e nënës së saj. Sinqeriteti i saj e frymëzoi Ritën që të tregonte përvojën e familjes së saj me kancerin, diçka që ajo tha se nuk dëshiron ta tregojë publikisht.
“Unë e di se si është të kesh një lloj lidhjeje me një këngë, dhe më pas ai kujtim qëndron gjithmonë me atë këngë”, filloi Rita, duke fshirë lotët.
“Mamaja ime gjithashtu kishte kancer. Kur ajo shkonte të merrte trajtimin e saj, dhe asaj i binin flokët ne ishim adoleshente”, vazhdoi ajo, me zërin që po i dridhej. “Ishte vërtet e çuditshme të shihje nënën tënde, të mos ishte superheroina që gjithmonë kishe parë tek nëna jote”.
Biondja me origjinë nga Kosova theksoi se kishte vështirësi të fliste për të gjitha. Rita vazhdoi duke thënë se nëna e saj kishte pasur kancer në gji, por që tashmë është një e mbijetuar.
“Është gjithashtu diçka për të cilën ajo ka folur. Ajo është një e mbijetuar, por e kishte në një moshë shumë të re,, dhe mendoj se është kaq e rëndësishme ta kesh atë kujtim me vete. Kur flas për nënën time kështu është vërtet e vështirë”, shkruan Living shqip.
Nëna e Ritës, Vera, u diagnostikua me kancer të gjirit në vitin 2005.
