Shefi i Grupit Parlamentar të AAK-së, Besnik Tahiri ka thënë se do bëjnë çmos për ta mundësuar tërheqjen e 30% të mjeteve nga Trusti, përcjell InLajmi.
Tahiri tha se kjo tërheqje është shumë e nevojshme, duke pasur parasysh edhe krizën që e ka përfshirë vendin.
Deputeti theksoi se Qeveria e Kosovës është humbur dhe tjetërsuar në petkun e pushtetit, ndërsa hallet e qytetarëve po i trajton vetëm gjatë fushatës zgjedhore.
Ai gjithashtu theksoi se qeveria ka bërë shumë gabim, që nuk e ka përkrahur ndryshimin e Ligjit për Fondet Pensionale të Kosovës.
Postimi i plotë i tij:
Edhe një gabim i Qeverisë!
Qeveria e Kosovës është humbur dhe tjetërsuar në petkun e pushtetit, ndërsa hallet dhe kërkesat e qytetarëve i trajton vetëm në fushatë zgjedhore. Qeveria e ka shumë gabim që nuk e përkrah nismën legjislative të Kuvendit të Republikës së Kosovës për plotësimin dhe ndryshimin e Ligjit për Fondet Pensionale të Kosovës.
Si Grup Parlamentar do të bëjmë çmos që ta mundësojmë tërheqjen e 30% të mjeteve nga Trusti. Tërheqja e kursimeve nga trusti, sidomos në kohën kur vendin e ka përfshirë kriza ekonomike, është shumë e nevojshme për këndellje të ekonomisë dhe familjeve kosovare. Pra, duhet shfrytëzuar të gjitha burimet, të gjitha alternativat duke shfrytëzuar në këtë rast edhe Trustin, për t’u dalë në ndihmë qytetarëve.
Mospërkrahja e qytetarëve në këtë kohë të goditjeve të mëdha ekonomike, tregon se kemi qeverisje pa Qeveri! /InLajmi/
