Kohëve të fundit po aktualizohet çështja e arsimit në Kosovë. Kështu u organizuan protesta nga ana e nxënësve, që kërkojnë cilësi më të mirë e ato të mësimdhënësve, që kërkojnë paga më të larta.
Lidhur me këtë çështje ministrja e Arsimit, Arbërie Nagavci, deklaroi se është duke u angazhuar që të përmirësojë kushtet e punës në shkolla, në mënyrë që të arrihet cilësia në mësim, por edhe paga e mësimdhënësve të jetë më e dinjitetshme.
Lidhur me grevën, që pritet të organizohet nga SBASHK-u, ministrja Nagavci sqaroi se nuk është opsion që duhet diskutuar, pasi nxënësit për shkak të pandemisë kanë pësuar shumë.
”Kërkesa që të jemi bashkë me nxënësit dhe për nxënësit, që të mos u mohohet e drejta për shkollim, duhet të jetë bashkë”, theksoi ajo.
Ministrja e Arsimit tha se ka forma të tjera të protestës, përveç grevave
Lidhur me arsyeshmërinë e grevës së SBASHK-ut, Arta Tahiri Beqa, analiste, deklaroi se asnjë nuk janë dakrod që fëmijët të humbin mësimin.
Ajo, mes tjerash, përkujtoi kohën e pandemisë, që shkaktoi dëme të mëdha në procesin mësimor, duke theksuar rëndësinë e pranisë së nxënësve në shkollë.
”Do të doja që greva e SBASHK-ut të mos mbahet tani, por më vonë, sepse mbajtja e grevës tani, por edhe në periudhën kur nxënësit përgatiten për testin e arritshmërisë”, shtoi ajo, shkruan RTK.
Ndërsa Rinor Qehaja, nga Instituti EDGUARD, theksoi se ndërprerja e procesit mësimor është në dëm të nxënësve. Ai, më tej, shprehu optimizmin se nuk do të ketë grevë të mësimdhënësve, duke logaritur në vullnetin e palëve për të gjetur një mirëkuptim për situatën në të cilën gjendet vendi