Deputeti i Partisë Demokratike të Kosovës, Ferat Shala ka thënë se opozita nuk ka bërë asgjë kundërligjore kur ka kërkuar formimin e Komisionit Hetimor Parlamentar për krizën në energji.
Ai ka thënë se kërkesa e tyre ka qenë e ligjshme.
“Nuk ka asgjë kundërligjore. Përkundrazi mire kryetarët e grupeve parlamentare e kanë shpjeguar. Deri në një moment edhe ku është lexu neni saktë i Kushtetutës në Kuvend. Këtu nuk ka asgjë që nuk dihet, asgjë që nuk është e shkruar, nuk kemi kërkuar diçka që nuk i përket.”
Shala theksoi se pozita nuk ka pse i ikë formimit të këtij Komisioni.
“A ka kund në botë që thuhet mos i kërko llogari, transparencë institucioneve të ekzekutivit. Cili është roli i Kuvendit nëse nuk ka debat, transparencë, nëse nuk ka mundësi me zbatu dhe implementu detyrat e tij. Ne si opozitë sot kemi kërkuar implementimi e Kushtetutës, ligjshmërisë dhe krijimin e një trupi i cili do të bëjë transparent tërë procesin. Nëse nuk kanë probleme menaxhuese pse duhet me i ikë kësaj pune”, tha Shala duke shtuar se pozita po frikësohet me krijimin e këtij Komisioni.
Deputeti i PDK-së përmendi se KOSTT është në prag të falimendimit për shkak të borxheve,tha ai në T7.
“KOSTT-in e kemi para falimentimit. Me dhjetëra milionë borxhe për shkak të mazhorancës që e kanë futur në borxhe”, tha ai.
