Përleshje mes protestuesve palestinezë dhe policisë izraelite kanë ndodhur në Malin e Tempullit në Jerusalem. Sipas Gjysmëhënës së Kuqe, janë të paktën 150 të lënduar. Mes tyre, edhe disa roje kantieri, të cilët dyshohet se janë goditur me plumba gome. Nga të plagosurit, 40 janë dërguar në spital dhe të paktën 2 janë në gjendje të rëndë. Sipas burimeve palestineze, ka edhe dhjetëra persona të arrestuar.
Zëdhënësi i Presidentit Abu Mazen e denoncoi “sulmin” nga policia izraelite si “një zhvillim të rrezikshëm dhe një shpallje lufte ndaj popullit palestinez”.
Nuk është ende e qartë se çfarë e shkaktoi dhunën. Organizata islamike që drejton vendin tha se policia izraelite hyri në zonë menjëherë pas lutjeve të mëngjesit, kur mijëra besimtarë ishin në xhami. Izraeli tha se agjentët e tij hynë për të hequr gurët që ishin mbledhur në pritje të përleshjeve, transmeton A2CNN.
Tensioni është rritur javët e fundit pas një serie sulmesh vdekjeprurëse nga palestinezët që kanë vrarë 14 persona në Izrael. Autoritetet në Jerusalem kryen një valë arrestimesh dhe operacionesh ushtarake në Bregun Perëndimor, duke shkaktuar përleshje në të cilat u vranë disa palestinezë. Dhjetëra mijëra palestinezë zakonisht mblidhen në Al-Aksa për lutjet e së Premtes, të cilat janë të tejmbushura me njerëz veçanërisht gjatë periudhës kur myslimanët kremtojnë muajin e shenjtë të Ramazanit.
