Asociacioni i Gazetarëve të Kosovës, ka shprehur shqetësim në lidhje me gjetjet kryesore të Raportit të Departamentit të Shtetit të SHBA-ve për Kosovë, përcjell InLajmi.
Në raportin e DASH-it thuhej se gazetarët e Kosovës kanë hasur në vështirësi gjatë rrugës së marrjes së informacionit, duke veçuar institucionet publike.
Ndërsa në lidhje më këtë ka reaguar AGK pasi sipas tyre nga DASH janë evidentuar problemet e financimit, kurse kjo thuhet ta ketë dëmtuar pavarësinë e medieve.
Ndërsa si përfundim AGK ka një kërkesë për të gjithë pronaret medieve, duke iu thënë ë gazetarët duhet të lejohen të postojnë lirshëm pa u frikësuar.
Njoftimi i plotë i Asociacionit të Gazetarëve të Kosovës:
Raporti i DASH-it: Gazetarët në Kosovë hasën në vështirësi në marrjen e informacionit nga Qeveria dhe institucionet publike
Asociacioni i Gazetarëve të Kosovës – AGK, shpreh shqetësimin lidhur me gjetjet kryesore të Raportit të Departamentit të Shtetit të SHBA-së për Kosovë.
Në raportin e publikuar këtë javë thuhet se pavarësisht që në përgjithësi u respektua liria e shprehjes, sërish pati tentime për frikësim të përfaqësuesve të medieve nga politikanë, persona publikë, biznese dhe grupe fetare.
Raporti evidenton se problemet e financimit gjithashtu dëmtuan pavarësinë e medieve, si dhe pati vështirësi në marrjen e informatave nga Qeveria dhe insitutcionet publike.
“Gazetarët hasën në vështirësi në marrjen e informacionit nga Qeveria dhe institucionet publike, pavarësisht nga ligjet që ofrojnë qasje në dokumente publike”, thuhet në raport.
Sipas raportit, mediat e pavarura ishin aktive dhe shprehën një shumëllojshmëri pikëpamjesh, përgjithësisht pa kufizime. Megjithatë, disa zyrtarë qeveritarë, parti politike, biznese të lidhura me Qeverinë, grupe fetare dhe individë të pakënaqur u bënin trysni pronarëve të mediave, redaktorëve dhe gazetarëve që të mos publikonin rrëfime ose materiale të caktuara.
Departamenti Amerikan i Shtetit citon raportet e Asociacionit të Gazetarëve të Kosovës, për sulmin fizik ndaj Visar Duriqit, intervistimin nga Prokuroria të Parim Ollurit për raportimin për vaksinat, si dhe kërcënimin e deputetit të Vetëvendosjes, Haki Abazi ndaj portalit “Albanian Post”, si tri prej incidenteve më të rënda në vitin 2021.
AGK-ja vlerëson se gjetjet e raportit duhet të jenë alarm për institucionet e vendit që duhet të angazhohen në krijimin e një ambienti më të mirë e të sigurt të të bërit gazetari.
AGK-ja gjithashtu fton pronarët e medieve që të lejojnë që gazetarët të raportojnë pa u cenzuruar e frikësuar se do të humbasin vendin e punës. /InLajmi/
