Vendimi i Gjykatës Kushtetuese, ka konstatuar se ministrja e Arsimit, Arbërie Nagavci, ka shkelur Kushtetutën pasi kjo e fundit kishte marrë vendim për organizimin e mësimit në komunën e Kamenicës, duke mos e përfillur reformën e ish-kryetarit të kësaj komune, Qëndron Kastrati, përcjell InLajmi.
Para disa minutash ishte Kastrati ai i cili përmes një interviste kërkoi shkarkimin e saj ose të jap vet ajo dorëheqje, dhe tregoi se i është dërguar vendimi i Gjykatës Kushtetuese.
Ndërsa menjëherë pas kësaj ka reaguar ministrja duke thënë së nëse ajo nuk do të vepronte atëherë do të ishte shkelje e të drejtave të fëmijëve, por gjithsesi ajo duket të jetë pajtuar më këtë veprim pasi ajo është shprehur se ditëve në vijim do ta analizojë vendimin e Gjykatës Kushtetuese.
Po përsëri ajo ka ritheksuar se nje gjë të tillë nuk do ta toleronte përsëri as si ministre, as si nënën e as si profesioniste.
Reagimi i plotë i saj:
E drejta për shkollim nuk mund t’i mohohet asnjë fëmije, nga askush. Është obligimi im kushtetues, profesional e moral që të angazhohem për realizimin e të drejtës për arsim për të gjithë fëmijët e Republikës së Kosovës, pa marrë parasysh ku ata jetojnë.
Vendimin për organizimin e mësimit alternativ të përshpejtuar, për 441 nxënës të Komunës së Kamenicës e kam marrë pasi dështuan të gjitha përpjekjet që një hap i tillë të ndërmirret nga kryetari i Komunës. Si Qeveri kemi obligim të sigurojmë vijimin e shkollës për të gjithë nxënësit dhe nuk mund të lejojmë që ata të bëhen peng i mosmarrëveshjeve në mes të Kryetarit të Komunës dhe komunitetit ku jetojnë.
Me marrjen e vendimit për mësim të përshpejtuar, 441 fëmijë në Komunën e Kamenicës janë rikthyer në bankat shkollore pas më shumë se 7 muajve. Rreth 100 nxënës të fshatit Busavatë për dy vite nuk kanë vijuar mësimin. Kjo është shkelje e të drejtave të fëmijëve, është papërgjegjësi, është e patolerueshme dhe e pafalshme.
Vendimin e GjK-së do ta analizoj me kujdes në ditët në vijim, por mbetem e bindur se mosveprimi nga ana ime në rastin e Kamenicës do te ishte shkelje e të drejtave të fëmijëve, shkelje e së drejtës kushtetuese për arsim, shkelje e konventave ndërkombëtare dhe në dëm të interesit të fëmijëve. Një gjë të tillë nuk mund ta toleroj as si ministre, as si nënë e as si profesioniste. /InLajmi/
