Kryeministri i Kosovës, Albin Kurti, në kuadër të “Ditës Ndërkombëtare të Romëve” ka uruar qytetarët e komunitetit rom, përcjell InLajmi.
Kurti theksoi se kjo ditë është për të festuar kulturën, trashëgiminë, gjuhën dhe simbolet rome.
Gjithashtu kryeministri tha se flamuri i komunitetit rom përfaqëson lëvizjen e përparimin.
Ai bëri thirrje që të punohet për të hequr paragjykimet mes tyre, të zvogëlohen pabarazitë për një jetë më të mirë për të gjithë.
Kurti tha se fjala rom do të thotë qenie njerëzore, njeri.
Tutje Kurti kujtoi edhe poetin e deputetin Kujtim Paçakun për veprimtarinë e tij, duke e cilësuar si njeri të veçantë.
Postimi i plotë i tij:
Të nderuar qytetarë të komunitetit Rom,
Bahtalo Romano Dive!
Urime për Ditën Ndërkombëtare të Romëve!
Sot është ditë për të festuar kulturën, trashëgiminë, gjuhën dhe simbolet rome. Flamuri kaltër e gjelbër, me rrotën e kuqe në mes, përfaqëson lëvizjen e përparimin.
Në këtë ditë, nderojmë të gjithë ata burra e gra, të cilët angazhohen pandalur për të çuar përpara komunitetin rom. Po punojmë ngushtë bashkë që të heqim paragjykimet mes nesh, të zvogëlojmë pabarazitë dhe të rrisim mundësitë për jetë më të mirë.
Fjala rom do të thotë qenie njerëzore, njeri.
Sot kujtojmë edhe një njeri të veçantë që e kishim mes nesh, poetin e deputetin Kujtim Paçaku dhe vargjet e tij:
“… O njeri,
Neve na ka krijuar Zoti
Si ty, si mua, si edhe ata
Nën ngjyrën e lëkurës tënde Fshehur ke një ylber
Mu brenda shpirtit tënd
Andaj, ballin lartë!”
Ishte kënaqësi e veçantë të vizitoja të martën organizatën më të vjetër rome “Durmish Aslano” në Prizren. /InLajmi/
