Sekretari amerikan i Shtetit, Antony Blinken dënoi ashpër Rusinë të dielën, duke e akuzuar atë për akte mizorie në Ukrainë, ndërsa bota pa pamjen e parë të trupave të ukrainasve të vdekur, të hedhur në rrugët e Buças, një qytet vetëm pak kilometra larg Kievit. Trupat u gjetën pasi forcat ruse u larguan nga zona.
“Nuk mund të mos ndjeni dhimbje”, tha diplomati më i lartë amerikan. “Ne nuk mund ta normalizojmë këtë gjë”, shtoi ai.
Blinken tha se Shtetet e Bashkuara do të shohin me vëmendje për të dokumentuar krimet e luftës të kryera nga Rusia në të gjithë Ukrainën dhe shtoi se autorët e vrasjeve, duhet të mbahen përgjegjës. Tashmë Kievi pretendon se ka rimarrë kontrollin e rajonit veriqendror rreth kryeqytetit.
Ministria ruse e Mbrojtjes i hodhi poshtë akuzat, duke thënë se pamjet dhe fotografitë që tregojnë trupat e pajetë në Buça ishin një tjetër provokim nga Kievi, shkruan VOA.
Organizata “Human Rights Watch” bëri të ditur të dielën se kishte dokumentuar disa raste të forcave ushtarake ruse që kryenin shkelje të ligjeve të luftës në rajonet e kontrolluara nga Rusia në Çernihiv, Kharkiv dhe Kiev.
