Presidentja e vendit, Vjosa Osmani iu është drejtuar besimtarëve myslimanë në nder të muajit të Ramazanit, duke ua uruar muajin e sakrificës dhe solidaritetit, përcjell InLajmi.
Sipas Osmanit, ky muaj është mundësi e mirë për të menduar për të gjithë, për të ndarë diçka nga vetja për të tjerët dhe për ta shpërfaqur shpirtin solidar, siç di dhe e ruan këtë traditë populli ynë ndër shekuj.
Osmani ka përçuar mesazhe pozitive për muajin e Ramazanit, duke thënë se ky muaj është adekuat për një përpjekje të përbashkët dhe dëshmi se duke bashkëndjerë me nevojtarët e bëjmë shoqërinë më humane e shtetin më të konsoliduar.
Në fund presidentja ka uruar agjërim më të lehtë për të gjithë, që ky muaj të kalojë në harmoni e paqe.
Njoftimi i plotë nga Zyra për Komunikim Publik:
Me rastin e fillimit të muajit të Ramazanit, dua t’i uroj të gjithë besimtarët e fesë islame për këtë muaj të sakrificës dhe solidaritetit. Ky muaj është mundësi e mirë për të menduar për të gjithë, për të ndarë diçka nga vetja për të tjerët dhe për ta shpërfaqur shpirtin solidar, siç di dhe e ruan këtë traditë populli ynë ndër shekuj.
Ne kemi nevojë për shpresë, kurajo dhe mbështetje të njëri tjetri, ndaj ky muaj është adekuat për një përpjekje të përbashkët dhe dëshmi se duke bashkëndjerë me nevojtarët e bëjmë shoqërinë më humane e shtetin më të konsoliduar.
Të dashur besimtarë, le të kalojë ky muaj në harmoni, paqe e mirëkuptim! Ju qoftë agjërimi i lehtë në muajin e shenjtë të ramazanit! /InLajmi/
