Bashkësia Islame e Kosovës ka reaguar ashpër për shenjën për ndalimin e shamisë të vendosur në Shkollën e Mesme Teknike “Nexhmedin Nixha”, në Gjakovë, raporton InLajmi.
Myftiu, Naim Tërnava, në një konferencë për media është pyetur lidhur me këtë rast, derisa ka deklaruar se beson se është një lëshim i rastit dhe se nuk është bërë me qëllim.
Tërnava ka ritheksuar se shpreson shumë që nuk është bërë me qëllim tash në prag të shënimit të muajit të madhëruar, derisa ka shtuar se BIK ka reaguar me kohë.
Ndryshe, BIK, pak minuta më parë përmes një njoftimi e ka dënuar aktin e drejtorisë së shkollës “Nexhmedin Nixha” në Gjakovë, e cila e trajton mbulesën e femrës sipas parimeve islame si një veprim ordiner.
“Një trajtim i tillë i parimeve fetare është mendësi e së kaluarës moniste. Mësimet e parimet fetare nuk dëmtojnë e nuk rrezikojnë shoqërinë, përkundrazi edukojnë, mësojnë e fisnikërojnë. Ky është qëllimi i besimit, e në këtë kontekst duhet parë edhe mbulesën e femrës myslimane”, thuhet në njoftim.
Tutje, BIK lidhur me këtë ka pasur një kërkesë nga Ministria e Arsimit, Shkencës dhe Teknologjisë.
“Për të mos na u përsëritur situata të tilla, kërkojmë edhe njëherë nga Ministria e Arsimit Shkencës e Teknologjisë, që ta anulojnë nenin 3 paragrafi 1 pika 1.13 të Udhëzimin Administrativ të MASHT-it 06/2014, të cilin e konsiderojmë si burim të këtyre akteve e veprimeve që krijojnë situata të tilla”, ka bërë me dije, BIK, përmes një njoftimi për media./InLajmi/
