Imami, Labinot Maliqi ka reaguar ndaj lajmit se është e ndaluar shamia në një shkollë në Gjakovë nga drejtoresha Florentina Gjergji, përcjell InLajmi.
E për këtë Maliqi e ka fajësuar kreun e AAK-së, Ramush Haradinaj, duke qenë se drejtoresha e shkollës, e cila ndaloi shaminë në shkolla është pjesë e AAK-së.
Mailiqi paralajmëron Haradinaj, që të ketë kujdes me gratë e partisë së tij, të cilat me veprime fashiste në prag të muajit të shenjtë të Ramazanit po e luftojnë besimin e 96,8% të popullit të Kosovës.
Sipas tij, Haradinaj nuk duhet të thotë që e respekton Islamin, përderisa hesht pranë dukurive të tilla.
Tutje imami i bën thirrje ministers së Arsimit, Arbërie Nagavcit, që ta shkarkojë nga detyra drejtoreshën Florentina Gjergjaj, në të kundërtën paralajmëron se do ta padisin MASHT-in për heshtje ndaj veprimeve të tilla.
Në fund thekson se si shtet demokratik që jemi dhe jo komunist, shkollimi dhe bartja e shamisë është e drejtë elementare njerëzore dhe nuk do të mund kurrë askush ta pengojë.
Postimi i plotë i tij:
Ramush Haradinaj, nëse t’u kanë lodh mashqit, kujdes me gratë e partisë të cilat me veprime fashiste në prag të muajit të shenjtë të Ramazanit po e luftojnë besimin e 96,8% të popullit të Kosovës. Pastaj, mos thuaj se unë e respektoj Islamin, hoxhallarët dhe besimtarët e devotshëm, ndërsa në anën tjetër heshtë përballë veprimeve fashiste dhe islamofobe të kryera nga bashkëpartiakët tuaj.
Drejtoresha e shkollës së mesme teknike “Nexhmedin Nixha” në Gjakovë, Florentina Gjergjaj, e cila vije nga radhët e AAK-së, me plot mllef dhe fashizëm ka vendosur në hyrje të institucionit shenjën kundër vendosjes së shamisë në shkollë, duke e barazuar atë me pistoletën, duhanin dhe dukuritë e tjera negative.
Për shkak të këtyre veprimeve fashiste, islamofobe, nxitje të urrejtjes, përçarjes dhe mosdurimit fetar, veprime të cilat e kanë prishur qetësinë dhe rendin tonë publik, i bëjë thirrje Ministres së Arsimit, Arbërie Nagavci, që ta shkarkoj menjëherë nga pozita e saj drejtoreshën Florentina Gjergjaj. Në të kundërtën, do të padisim MASHT-in për heshtje ndaj këtyre veprimeve të dënueshme me ligj, apo marrjen e masave të lehta përballë kësaj situate tepër të rëndë dhe serioze.
Si shtet demokratik që jemi dhe jo komunist, shkollimi dhe bartja e shamisë është e drejtë elementare njerëzore dhe nuk do të mund kurrë askush ta pengoj. /InLajmi/
