Deputetja e PDK-së, Ganimete Musliu, foli për opozitarizmin e PDK-së.
Musliu deklaroi që në asnjë moment nuk ia dëshiron dështimin e Qeverisë Kurti, sepse në dështimin e saj ndërlidhet edhe Kosova.
“Në asnjë moment nuk ia dëshiroj dështimin Qeverisë së Kosovës dhe Qeverisë Kurti, sepse sot do të doja të renditja disa suksese të kësaj qeverie, sepse kur dështon Qeveria e Kosovës, dështon edhe Kosova. Nëse kjo Qeveri që kemi dështon, atëherë vendi do të shënojë regres, dhe në asnjë formë nuk jam lutur, dhe nuk kam dashur të flas për dështimet e Qeverisë, por fatkeqësisht jemi këtu ku jemi, dhe unë personalisht nuk e di një punë që mund të them e ka kryer kjo Qeveri, ku ne si Opozitë dhe qytetarë do të duhej ta pranonim”, tha Musliu.
Sipas saj, mossuksesin e Qeverisë deri më tani e kanë shprehur më së miri vetë qytetarët.
“Unë udhëhiqem pak a shumë nga fjalët e urta popullore, që thonë “inati mund ta kesh, por hakun jepja”, dhe unë do të doja të kisha një argument apo një fakt që kësaj qeverie, t’ia hap hakun e t’i them që këtë punë e ka bërë mirë, deri më tani qytetarët e shprehin më së miri mos suksesin e kësaj qeverie”, tha Musliu.
Po ashtu, duke kritikuar Qeverinë Kurti, deputetja Musliu tha se në secilën ministri ka skandale me bollëk, tha ai në Tëvë1.
“Ligji i pagave është dashur të vi në Kuvend kjo është pika e parë që është aktuale në Kosovë, që ne jemi duke e diskutuar në vazhdimësi, nëse flasim për Ministrinë e Punëve të Jashtme, skandale me bollëk, nëse flasim për Ministrinë e Punëve të Brendshme, skandale me bollëk dhe nëse flasim për Ministrinë e Mbrojtjes, skandale me bollëk”, shtoi tutje ajo.
