Këshilli për Mbrojtjen e të Drejtave e të Lirive të Njeriut (KMDLNJ) ka reaguar së fundmi lidhur me rastin e vendosjes së shenjës për ndalesën e mbulesës në objektin e shkollës së mesme teknike “Nexhmedin Nixha” në Gjakovë, përcjell InLajmi.
“Shenja e parë në këtë mozaik ishte mbulesa apo shamia që e përdorin besimtarët e besimit islam. Kjo vendosje e shenjave, përkatësisht e shamisë nxiti shumë reagime në opinion me ç’rast nuk u kursyen as fjalët më të rënda: Drejtoresha e shkollës, Florentina Gjergjaj tha se vetëm po e zbaton Udhëzimin Administrativ të MASHT-ë 06/2014 dhe se ndjehet e kërcënuar nga deputetja, Duda Balje që këtë veprim të shkollës e cilësoi si fyerje ndaj femrës që bartë shami dhe cenim të të drejtave dhe lirive fetare duke e akuzuar drejtoreshën se nuk ka bazë ligjore për këtë veprim diskriminues”, njofton KMDLNJ, përmes një komunikate për media.
Më tej ky Këshill ka kërkuar që gjithashtu të rregullohet udhëzimi administrativ për bartjen e shamisë.
“Bartja e shamisë pati nxitur shumë debate sidomos viteve të fundit dhe KMDLNJ ka kërkuar të rregullohet specifikisht me ligj kjo çështje ndërkaq konsideron se vajzave dhe femrave që kanë bartur shami iu janë shkelur të drejtat e njeriut, si në shkollë ashtu edhe gjatë konkurrimit për një vend pune ku përcaktuese për mospranim nuk ka qenë mos përgatitja profesionale por bartja e shamisë ndonëse në vendim për refuzim nuk thuhet ashtu”, thuhet tutje në njoftimin e këtij Këshilli.
E KMDLNJ ka kërkuar nga Drejtoria komunale e Arsimit në Gjakovë menjëherë ta largojë atë shenjë diskriminuese nga shkolla dhe të kërkojë falje publike besimtarëve që janë ndier me të drejtë të fyer. /InLajmi/
