Drejtori i Përgjithshëm i Policisë së Kosovës, Samedin Mehmeti gjatë raportimit në Komisionin për Siguri, ka dhënë detaje për konkursin për rekrutët e rinj, raporton InLajmi.
Drejtori i Policisë tregoi se pyetjet për konkursin ishin për 250 zyrtarë policorë. Ai ka thënë se në këtë konkurs aplikuan 11 mijë e 516 kandidatë, ndërsa nga 8.000 kandidatë sa i ishin nënshtruar testit vetëm 1.000 e kanë kaluar.
“Pas mbylljes së konkursit është themeluar komisioni përgjegjës për mbarëvajtjen dhe mbikëqyrjen e procesit. Për hartimin e pyetjeve nga matematika dhe gjuha shqipe ka pasur konsultim me profesorët e fakultetit të edukimit. Kurse nga fushat e përgjithshme Policia e Kosovës ka themeluar grupin punues që pyetjet të jenë të thjeshta të përgjithshme pa u thelluar në njohuri akademike, pyetje kryesisht që mësohen në shkollë fillore apo të mesme. Në këtë test me shkrim janë hartuar 6.000 pyetje. Testi është përbërë nga 100 pyetje dhe ishte koha 2:30 orë”, tha Mehmeti.
Tutje, tha ai se gjatë shqyrtimit të aplikacioneve kemi vërejtur se një numër i madh i kandidatëve ka pasur rezultate të kalueshmërisë së shkollimit të mjaftueshëm apo të mirë.
“Gjatë shqyrtimit të aplikacioneve kemi vërejtur se një numër i madh i kandidatëve ka pasur rezultate të kalueshmërisë së shkollimit të mjaftueshëm apo të mirë. Komisioni e ka bërë publikimin e rezultateve dhe nga 8.000 kandidatë që i janë nënshtruar 1.000 e kanë kaluar dhe 7.000 kanë dështuar. Ka pasur dilema se a e kanë kaluar shumë apo pak. Kemi pasur për bazë rekrutimin e vitit 2014 dhe 2018. Më 2014 janë ftuar afro 2.000 prej tyre 2.881 e kanë kaluar kurse kanë dështuar 15 mijë”, tha ai./InLajmi/
