Analisti politik Arbër Vllahiu ka thënë se duke parë deklarimet e Prishtinës dhe Beogradit, krijohet përshtypja se të 2-ja palët janë të gatshme për konflikt.
Ai deklaroi se të 2-ja palët po ngritin tensione, duke thënë se për “vallëzim tango duhen 2 persona”.
“E para duhet qartësuar çka është e drejtë dhe ajo që është e drejtë a është edhe e mundshme dhe reale, e 2-ta çka është e mundshme a është e dobishme dhe e 3-ta nëse është e dobishme a është e ligjshme dhe a është legjitime. Në tërë këtë tollovi që është krijuar ditëve të fundit duhet parë nëse vendimi i Qeverisë së Kosovës është vendim i dobishëm për Kosovën në një moment të caktuar politik, ose në një moment të caktuar kur ndodhin zhvillime të mëdha në botë – qoftë lufta në Ukrainë apo kriza të tjera në botë. Duhet ekskluzivisht parë se cila do të jetë dobia e vendimit të qeverisë së Kosovës. Nga deklaratat që i shohim unë mund të them që për vallëzim tango duhen 2 vetë, por edhe për konfliktin duhen 2 vetë. Nga krejt ajo që shohim sot nga deklarimet në Beograd dhe deklarimet në Prishtinë na del sikur të 2-ja palët janë shumë të gatshme për t’u konfliktuar me njëra-tjetrën”.
“Është deklarata e [Aleksandar] Vuçiqit në Beograd që Marrëveshja e Brukselit ka vdekur, kurse deklarata e [Albin] Kurtit në Prishtinë ka qenë që janë 10 organizata paralele apo të tilla në veri të Kosovës, të cilat mund ta rrezikojnë sigurinë e Kosovës. Jemi në një situatë kur të 2-ja palët janë të gatshme për konflikt, verbalisht dhe deklarativisht dhe që të 2-ja palët janë duke ngritur tensione”.
Bashkësia Ndërkombëtare, sipas Vllahiut, duhet të bëjë një kërkesë për të 2-ja palët që të qetësohen dhe të mos ngritin tensione.
Ai ka deklaruar se vendimi i Qeverisë së Kosovës për moslejimin e zgjedhjeve serbe në Kosovë është i drejtë, por jo edhe i dobishëm për shkak që, sipas tij, kjo e vë Kosovën në pozitë të vështirë karshi Bashkësisë Ndërkombëtare.
“Vendimet e Qeverisë së Kosovës janë të trefishta në konfliktuim me Bashkësinë Ndërkombëtare. Vitin e kaluar, në muajin shtator, kemi pasur vendimin e parë të Qeverisë së Kosovës, që ishte dërgimi i forcave speciale në veri të Kosovës në vend që ta bënte një formë tjetër, duke zhvendosur dialogun nga ai politik në teknik. E 2-ta është që Kosova është marrë më fajtore për ndërprerjen e dialogut me Serbinë dhe e 3-ta janë 2 vendimet për moslejimin e mbajtjes së referendumit serb dhe zgjedhjeve serbe në Kosovë”, tha ai në “Rubikon” të Klan Kosovës.
“Vendimi në aspektin kushtetues i Qeverisë së Kosovës është i drejtë, por a është vendimi i dobishëm në momentin e caktuar mendoj se jo. Mendoj se kemi ardhur në një pozicion kur politika e jashtme e Kosovës po konfliktohet me bashkësinë ndërkombëtare. Jemi në pozicion të vështirë karshi bashkësisë ndërkombëtare prej të cilës po kërkojmë anëtarësim në BE, anëtarësim në NATO, përshpejtimin e proceseve të tjera të ndërkombëtarizimit të Kosovës. Ne po kërkojmë diçka, por në anën tjetër nuk po kryejmë atë që po kërkohet prej nesh”.
